Prokýratýra saıası-qýǵyn súrginnen japa shekkenderdiń quqyn qorǵady- Qyzylorda

ASTANA. QazAqparat - Qyzylorda oblysynda prokýrorlar saıası qýǵyn-súrginnen zardap shekken adamdardyń quqyǵyn qorǵady, dep habarlaıdy QazAqparat.

Oblystyq prokýratýranyń baspasóz hatshysy Seıil Botakózdiń habarlaýynsha, Jańaqorǵan aýdandyq prokýratýrasy aýdandaǵy 9 saıası qýǵyn-súrgin qurbany mártebesi bar turǵynnyń jeteýine sońǵy 2 jyl boıy tıesili kómek kórsetilmegendigin anyqtaǵan.

Aıta keterligi, Jańaqorǵan aýdandyq máslıhatynyń sheshimimen (2013-2016 jyldar aralyǵynda qabyldanǵan) «Áleýmettik kómek kórsetý, onyń mólsherlerin belgileý jáne muqtaj azamattardyń jekelegen sanattarynyń tizbesin aıqyndaý» qaǵıdalary bekitilgen. Qujatqa sáıkes, 31 mamyr - Saıası qýǵyn-súrgin jáne asharshylyq qurbandaryn eske alý kúnine oraı saıası qýǵyn-súrgin qurbandaryna, múgedek bolyp qalǵan nemese zeınetker bolyp tabylatyn saıası qýǵyn-súrginnen zardap shekken adamdarǵa - 3 aılyq eseptik kórsetkish mólsherinde jylyna bir ret áleýmettik kómek kórsetiledi.

Aýdandyq prokýratýrasynyń qadaǵalaý aktisi negizinde 31 mamyr - saıası qýǵyn-súrgin jáne asharshylyq qurbandaryn eske alý kúnine oraı, atalǵan azamattarǵa 3 aılyq eseptik kórsetkish mólsherinde áleýmettik kómek kórsetilip, quqyqtary qorǵaldy.