Prokýratýra reıdi: Mańǵystaýda zańsyz qum urlaý faktisi tirkeldi
ASTANA. KAZINFORM — Mańǵystaýda «Taza Qazaqstan» aktsııasy aıasynda ekologııalyq zańbuzýshylyqtar anyqtaldy, dep habarlaıdy oblystyq prokýratýranyń baspasóz qyzmeti.
Mańǵystaý oblysynda «Taza Qazaqstan» respýblıkalyq ekologııalyq aktsııasy aıasynda tabıǵat qorǵaý prokýratýrasy ýákiletti organdarmen birlesip reıdtik is-sharalar ótkizdi. Nátıjesinde birqatar ekologııalyq zańbuzýshylyq anyqtaldy.
— Reıd barysynda Aqtaý qalasy men Munaıly aýdany aýmaqtarynda turmystyq qatty qaldyqtar men qurylys qoqystarynyń zańsyz úıilgen oryndary belgili boldy. Osyǵan baılanysty aýmaqtardy tazartý jóninde jaýapty memlekettik organdarǵa tıisti tapsyrmalar berildi. Anyqtalǵan zańbuzýshylyqtar boıynsha aýdan ákiminiń orynbasary men birneshe jeke tulǵa ákimshilik jaýapkershilikke tartylsa, qalalyq ákimdik qyzmetkerlerine tártiptik sharalar qoldanyldy, — delingen habarlamada.
Sonymen qatar tekserý kezinde zańsyz qum óndirý deregi de anyqtaldy. Atalǵan fakt boıynsha Munaıly aýdandyq polıtsııa bóliminiń jedel-tergeý toby shaqyrylyp, oqıǵa aqparattyq esepke alý kitabyna tirkeldi.
Prokýratýra qorshaǵan ortany qorǵaý men tazalyqty saqtaý ár azamattyń ortaq mindeti ekenin atap ótti. Vedomstvo turǵyndardy qoqysty arnaıy belgilengen oryndarǵa tastap, tabıǵatqa uqypty qaraýǵa shaqyrdy.
Osydan buryn Mańǵystaýda quny 870 mln teńgelik 50 gektar jer memleket menshigine ótkenin jazdyq.
