Prokýratýra organdary jyl basynan beri eńbekkerlerdiń quqyqtaryn qorǵaýmen baılanysty 17 qylmystyq is qozǵaǵan
TANA. 20 qazan. QazAqparat /Aıdar Ospanalıev/ - Prokýratýra organdary eńbekkerlerdiń quqyqtaryn qorǵaý baǵytynda bıylǵy jyldyń 9 aıynda jiberilgen kemshilikterdi joıý jóninde 1,5 myńnan astam usynys pen uıǵarym engizgen.
Bul málimettermen búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov tanystyrdy.
Onyń aıtýynsha, prokýrorlar 146 myń eńbekkerdiń 8,1 mıllıard teńgeni quraıtyn jalaqylarynyń tólenýine yqpal etken. Sondaı-aq azamattardyń eńbek quqyqtaryn buzý jaǵdaılary da prokýrorlardyń basty nazarynda. «Almaty qalasynyń Alataý aýdandyq prokýratýrasy qyzmetkerleri qozǵaǵan qylmystyq is negizinde (Vtorma Ecology Co) Vtorma Ekolodjı Ko jaýapkershiligi shekteýli seriktestiginiń dırektory R.Parmanbekov eńbekkerlerge birneshe ret jalaqy tólemegendigi úshin 500 aılyq eseptik kórsetkish kóleminde aıyppul tóledi. Jalpy jyl basynan beri eńbekkerlerdiń quqyqtaryn qorǵaýmen baılanysty 17 qylmystyq is qozǵalyp, 2 myńnan astam adam ákimshilik jáne tártiptik jaýapqa tartyldy», - dedi resmı ókil.
