Prokýratýra organdary júıke aýrýlaryn emdeıtin aýrýhanalardy tekserip, 45 laýazym ıesin jaýapqa tartty
ASTANA. 4 qarasha. QazAqparat /Aıdar Ospanalıev/ - Eldegi júıke aýrýlaryn emdeıtin mekemelerge tekserý júrgizgen Bas prokýratýra onyń barysynda anyqtalǵan kemshilikter boıynsha 46 prokýrorlyq qadaǵalaý aktisin engizip, olar boıynsha 45 laýazym ıesi jaýapqa tartyldy. Bul máseleler jóninde búgin jýrnalıstermen bolǵan brıfıngte Bas prokýratýranyń resmı ókili Jandos Ómiralıev málim etti.
Onyń aıtýynsha, júıke aýrýymen naýqastanǵan azamattardy qoǵamnan múldem shektep tastaýǵa bolmaıdy. Olar belgili bir deńgeıde aınalasyndaǵylarmen baılanysyp turýy qajet. Al naýqasty múldem shektep tastaý onyń densaýlyǵyna keri áserin tıgizedi.
«Ókinishke oraı bul talaptar kóptegen mekemelerde nazardan tys qalyp otyr. Mysaly Jambyl, Qostanaı, Mańǵystaý, Ońtústik Qazaqstan oblystaryndaǵy medıtsına mekemelerinde telefon baılanysy joq bolsa, Almaty qalasy men Jambyl, Batys Qazaqstan jáne Soltústik Qazaqstan oblystaryndaǵy mekemelerde naýqastardyń týǵandarymen kezdesetin arnaıy bólmeleri joq. Al Rýdnyı qalalyq psıhıatrııalyq aýrýhanasynda aýrýhanaǵa kirip, shyǵatyn azamttardy tirkeý jumystary talapqa saı emes. Sondaı-aq elimizdiń kóptegen aımaqtaryndaǵy medıtsına mekemelerinde naýqastardy tamaqtandyrý jumystarynyń durys júrgizilmeıtindigi málim boldy», - dedi resmı ókil.
