Prokýratýra organdary leıkemııa aýrýyna shaldyqqan balalarǵa «S» vırýs gepatıtin juqtyrý oqıǵasy boıynsha taǵaıyndalǵan tekserýdi aıaqtady
ASTANA. Shildeniń 22-si. QazAqparat /Rýslan Ǵabbasov/ - Prokýratýra organdary leıkemııa aýrýyna shaldyqqan balalarǵa «S» vırýs gepatıtin juqtyrý oqıǵasy boıynsha taǵaıyndalǵan tekserýdi aıaqtady. Bul týraly búgin Astanada ótken brıfıngide Bas prokýratýranyń resmı ókili Nurdáýlet Súıindikov málim etti.
«Juqtyrý kózderin anyqtaý maqsatynda Pedıatrııa jáne balalar hırýrgııasy ǵylymı ortalyǵynda jáne respýbıkalyq qan ortalyǵynda tekserýler júrgizildi. Aýmaqtyq prokýrorlar jergilikti emdeý profılatıkalyq mekemelerinde balalardyń aýrýdy turǵylyqty jerlerinde juqtyrý múmkindigin tekserdi. Sondaı-aq medıtsınalyq kartochkalary boıynsha árbir balany emdeý jáne onyń júrip turýy baqylandy, 1000 astam donorlar tekserildi», - dedi resmı ókil brıfıngide.
«Qabyldanǵan sharalarǵa qaramastan, balalarǵa atalǵan vırýsty juqtyrý kózin naqty anyqtaý múmkin bolmady. Búgingi tańda osy tekserý nátıjeleri boıynsha prokýrorlyq yqpal etý sharalaryn qabyldaý úshin negiz joq», - dedi ol.
N.Súıindikovtyń sózine qaraǵanda, sonymen birge týyndyǵan máselelerdi joıý maqsatynda qan ortalyqtaryndaǵy zerthanalyq zertteýlerdiń mindetti sharty retinde barlyq donorlardyń qan sarysýlarynyń qaldyq mólsherlerin muraǵattaýdy jáne keminde bes jyl saqtaýdy kózdeıtin ereje bekitildi.
«Demek, aldaǵy ýaqytta belgili bir donor qanynyń tazalyǵyna kúmán keltirilse, qan úlgilerin saqtaý merzimi ishinde olardy qaıta zertteý múmkindigi bolady», - dedi resmı ókil.
