Prokýratýra organdary QR Prezıdentiniń kezekten tys saılaýy kezeńinde saılaý zańnamasynyń qoldanylýyn qadaǵalaýda
ASTANA. 3 sáýir. QazAqparat - Elimizdiń qoldanystaǵy zańnamasyna saı prokýratýra organdary QR Prezıdentiniń kezekten tys saılaýy kezeńinde saılaý zańnamasynyń qoldanylýyn qadaǵalaýdy júzege asyrýyn jalǵastyrýda. Bul aqparatty QR Bas prokýratýrasynyń baspasóz qyzmeti taratyp otyr.
«Prokýratýra organdary Saılaý zańnamasynyń buzylýy týraly shaǵymdar men aryzdardyń turaqty monıtorıngin jalǵastyrýda, qajet bolǵan jaǵdaıda tekserýler júrgizilip, prokýrorlyq yqpal etý sharalary qabyldanady», - delingen baspasóz habarlamasynda.
Vedomstvonyń atap ótýinshe, saılaý naýqanynyń ótken kezeńi ishinde azamattar men zańdy tulǵalardan memlekettik organdarǵa saılaý zańnamasyna qatysty barlyǵy 822 ótinish tústi. Olardyń ishinde prokýratýra organdaryna barlyǵy 59 aryz túsip, onyń 47-sin shaǵymdar, 10-yn aryzdar jáne 2-ýin usynystar quraǵan.
Shaǵymdardyń negizgi bóligi, atap aıtqanda 25-i saılaý aldyndaǵy úgitti júrgizýdiń belgilengen tártibin buzý týraly habarlamalar bolǵan.
Laýazymdy tulǵalardyń áreketterine 8, al saılaý komıssııalarynyń áreketterine 7 jaǵdaıda shaǵym keltirilgen. 47 shaǵymnyń tek 11-i ǵana obektıvti túrde rastalǵan. Rastalǵan jaǵdaıda laýazymdy tulǵalardyń áreketterine prıntsıpıaldy túrde baǵa beriledi.
Ótken kezeń ishinde Qazaqstan Respýblıkasynyń sottaryna saılaý úrdisine qatysty 18 aryz túsken, onyń 4-eýi boıynsha talaptardy qanaǵattandyrýdan bas tartý týraly sheshim shyǵarylyp, 6-ýyn qabyldaýdan bas tartyldy, 3-eýi qaıtarylyp, 5 aryz boıynsha óndiris qysqartyldy.
Aıta keterligi, bul saılaý tynyshtyqta ótýde, sondyqtan prokýratýra organdarynyń qyzmeti saılaý úrdisinde barlyq qatysýshylarǵa negizinen profılaktıkalyq, túsindirý jáne eskertý sharalaryn qabyldaýǵa baǵyttalǵan.
