Prokýratýra organdary eldegi kóshi-qon máselesine alańdap otyr

Bul týraly búgin jýrnalıstermen bolǵan aptalyq brıfıngte Bas prokýratýranyń resmı ókili Jandos Ómiralıev málim etti.

Onyń sózine qaraǵanda, Qazaqstan búginde álemdik kóshi-qon úderisiniń belsendi qatysýshysy. Osyǵan qaraı prokýratýra organdary kóshi-qon salasyndaǵy zańdardyń oryndalýyn qamtamasyz etý isine basa kóńil bólýde. Al bul baǵytta júrgizilgen arnaıy tekserý jumystary Qazaqstanda kóptegen sheteldikterdiń zańsyz júrgendigin anyqtady. Naqtyraq aıtqanda, sheteldikterdiń biri elde bolý jónindegi erejeni buzsa, taǵy bir jaǵdaıda sheteldikterdi eline qaıtarý jónindegi sot sheshimi oryndalmaǵan. Sondaı-aq mıgratsııalyq polıtsııa bólimine tirkelmeý, eńbek qatynastaryn buzý, tirkelgen jerinde turaqtamaý sııaqty keleńsizdikter de oryn alýda.

«Mysaly Almaty qalasy men oblysynda sondaı-aq Aqtóbe, Jambyl, Batys Qazaqstan, Qostanaı, Mańǵystaý jáne Ońtústik Qazaqstan oblystarynda 400 sheteldik ózderiniń jeke sharýalarymen kelgenderine qaramastan, elimizdiń zańdaryn buza otyryp, Qazaqstan aýmaǵynda jumys istep júrgen. Sondaı-aq Almaty qalasy, Aqtóbe, Qyzylorda, Mańǵystaý jáne Ońtústik Qazaqstan oblystarynda jeke kýálikterin ishki ister organdarynda tirkemegen 60 sheteldik anyqtalǵan. Sonymen qatar osy aımaqtarda tirkelgen oryndarynda turaqtamaýmen baılanysty 35 fakti anyqtaldy»,-dedi resmı ókil.