Prokýratýra, ombýdsmen týraly konstıtýtsııalyq zańdar qabyldanady
«Biz zań shyǵarý jumysyna erekshe qarqyn berdik. Endi osy qarqyndy aldaǵy kezeńde de saqtaýdyń mańyzy zor. Kezekti parlamenttik sessııada zań shyǵarý jumysy, eń aldymen, Prezıdentimiz Qasym-Jomart Kemeluly Toqaevtyń Joldaýynda alǵa qoıylǵan mindetterdi oryndaýǵa, konstıtýtsııalyq reformalardy iske asyrýǵa baǵyttalatyn bolady. Atap aıtqanda, 20-dan astam jańa zań jobasyn ázirlep, qabyldaýymyz qajet. Prokýratýra, ombýdsmen týraly konstıtýtsııalyq zańdar qabyldanady. Saılaý, saıası partııalar týraly jáne basqa zańdarǵa ózgerister engiziledi. Memleket basshysy Ulttyq quryltaıda sóılegen sózinde reformany uzaqqa sozbaý kerek ekenin atap ótti. Halyq naqty ózgeristerdiń qazir bolǵanyn qalaıdy», - dedi E. Qoshanov.
Osy oraıda ol Memleket basshysy basty zańdardy jyl sońyna deıin qabyldaýdy tapsyrǵanyn eske saldy.
«Sondyqtan, biz – depýtattar bul jumysqa parlamenttiń kúzgi sessııasy bastalǵan kezde dereý kirisýimiz qajet. Parlament Prezıdent bastama jasaǵan reformalardy zańnamalyq turǵydan qamtamasyz etý boıynsha odan ári de serpindi jumys isteýdi jalǵastyrady. Otandyq ekonomıkanyń jańa modelin qalyptastyrýǵa, azamattarǵa áleýmettik kepildikterdi qamtamasyz etýge, kásipkerlikke
jan-jaqty qoldaý kórsetýge baǵyttalǵan zańdar parlamentarıılerdiń nazarynda bolady», - dedi Májilis tóraǵasy.
«Elimizde bolyp jatqan ózgeristerge árqaısymyz óz mindetimizdeı qarap, bir kisideı jumyla kirissek qana, shyn mánindegi Jańa Qazaqstandy qura alamyz. Aldaǵy jumysymyzda biz Memleket basshysy Qasym-Jomart Kemeluly Toqaevtyń jańa bastamalary men reformalaryn iske asyrýǵa jumylýymyz kerek. Kez kelgen synaqty birlesip eńsersek, Qazaqstannyń áleýeti budan da arta túspek», - dedi Erlan Qoshanov.
Budan buryn habarlanǵandaı, E. Qoshanov ekinshi sessııanyń zańnamalyq kún tártibi aıtarlyqtaı mazmundy bolǵanyn aıtty.
«Máselen, Pralament palatalarynyń 4-shi birlesken otyrysy ótti. Májilistiń 42 jalpy otyrysy ótip, onda 271 másele qaraldy. Senattyń 42 jalpy otyrysy ótip, onda 148 másele qaraldy. Osy sessııa kezinde qos palatanyń jumysynda 127 zań jobasy boldy, onyń 78-i qabyldandy», - dedi Májilis tóraǵasy.