Prokýratýra: Murathan Toqmadı prokýrormen kelisim jasamaq
ALMATY. QazAqparat - Murathan Toqmadı kináni moıyndaý týraly prokýrormen protsessýaldyq kelisim jasaýǵa kelisti, dep habarlaıdy QazAqparat tilshisi.
Qalalyq prokýratýranyń baspasóz qyzmetiniń habarlaýynsha, atalǵan qylmystyq istiń tergelý barysy Almaty qalasy prokýratýrasynyń baqylaýyna alynǵan.
«5 qyrkúıekte Murathan Toqmadı kináni moıyndaý týraly prokýrormen protsessýaldyq kelisim jasaýǵa kelisti. Atalǵan talap-tilek protsessýaldyq prokýrormen qaralǵannan keıin protsessýaldy kelisim jasaý máselesi sheshiledi», - dedi baspasóz qyzmetinen.
Prokýratýra Toqmádıdiń burynǵy qorǵaýshylary nege isten shettetilgeni týraly túsindirdi.
«QR QІJK-niń 70-baby 5-bólimine sáıkes qorǵaýshy
zań kómegin júzege asyrýǵa baılanysty ózine belgili bolǵan málimetterdi jarııalaýǵa quqyly emes.
QR QІJK-niń 201-babyna saı sotqa deıingi tergep-tekserý derekteri prokýrordyń ruqsatymen jarııa etilýi múmkin.
Sotqa deıingi tergep-tekserýdi júzege asyratyn adam qorǵaýshyǵa óziniń ruqsatynsyz istegi málimetterdi jarııa etýge jol berilmeıtini týraly eskertedi. Bul týraly kórsetilgen adamdardan jaýaptylyq týraly eskertile otyryp qolhat alynady. Qorǵaýshylar Álimjan Oralbaı jáne Djohar Ótebekov ózderine atalǵan mindettemelerdi qabyldaýdan bas tartty.
Osyǵan baılanysty kúdiktiniń qorǵaýshylary A.Oralbaı men D.Ótebekov aǵymdaǵy jyldyń 29 jáne 31 tamyzynda qylmystyq is-júrgizý normalaryn saqtaýdan bas tartyp jáne zań boıynsha ári qaraı is júrgizýge qatysý múmkindiginiń bolmaýyna baılanysty, qylmystyq iske qatysýdan shettetildi (QІJK 94 baby 1 bólimi 4 tarmaq)», - dedi prokýratýradan.
7 kyrkúıekte M.Toqmadı belgilengen qorǵaýshy E.Sultanovtan bas tartty.
Qazirgi ýaqytta qorǵaýshyny aýystyrý máselesi sheshilýde.
Aıta ketý kerek, vedomstvoaralyq jedel-tergeý toby M.Toqmadıǵa qatysty bopsalaý, atys qarýyn jáne oq-dárilerdi zańsyz aınalymǵa shyǵarý baptary boıynsha (QK-niń 194-287-baptary) sotqa deıingi tergeý amaldaryn júrgizip jatyr.
