Prokýratýra múgedek azamattyń quqyn qorǵady

Bul týraly QR Bas prokýratýrasynyń baspasóz qyzmetinen habarlandy.

Baspasóz qyzmetiniń málimetinshe, Qostanaı kólik prokýratýrasynyń senim telefonyna «Jeldorvodteplosnabjenıe» AAQ-nyń burynǵy jumysshysy, jaraqat alýyna baılanysty 3-toptaǵy múgedek bolǵan azamattan ótinish kelip túsken. Ótinish berýshiniń aıtýynsha, 2001 jyly ol óndiris jumysy barysynda oń qolynan jaraqattyq ampýtatsııa alǵan. Soǵan oraı, jumys berýshige múgedektiń protez-ortopedııalyq kómegin qamtamasyz etýge baılanysty shyǵyndardy tóleý týraly jaýapkershilik júktelgen edi. «Budan keıin kásiporyn qaıta qurylyp, burynǵy uıymnyń quqyqtary men mindetteri «Temirjoljylý-Qusmuryn» JShS-ǵa ótken. Osyǵan oraı, protezdi taǵý merzimi ótip, ony aýystyrý qajettiligi týyndaǵan merzimde múgedek azamat «Temirjoljylý-Qusmuryn» JShS-ǵa barlyq shyǵyndardy ótep berý týraly ótinish jasaıdy. Alaıda, kásiporyn basshylary shotta qarajattarynyń joqtyǵyna siltep, odan bas tartqan», - delingen baspasóz aıǵaǵynda.

Osy negizde kelip túsken ótinishke oraı, Qostanaı kólik prokýratýrasy tekserýler júrgizdi. Onyń nátıjesi boıynsha protezdi almastyrýǵa qajetti 950 myń teńge shamasynda qarajat óndirilip, bul «Petropavl protezdeý-ortopedııalyq ortalyǵynyń» esepshotyna jiberilgen.