Prokýratýra men QAJ Komıteti Janbolat Mamaıdyń abaqtydaǵy jaǵdaıyna tekserý júrgizdi

ASTANA. QazAqparat - Almaty qalasynyń prokýratýrasy QR ІІM Qylmystyq-atqarý júıesi komıtetimen birlesip advokat J.Balǵabaevanyń shaǵymyna jáne tergeý-qamaýyndaǵy Janbolat Mamaıǵa qater tóngeni jáne qysym kórsetilgeni týraly BAQ-ta jarııalanǵan shaǵymǵa qatysty tergeý júrgizdi, dep habarlaıdy atalǵan vedomstvonyń baspasóz qyzmeti.

Janbolat Mamaıdan jaýap alý barysynda ol aýyzsha jáne jazbasha túrde tergeý ızolıatorynyń ákimshiligine jáne kamerada ustaýda otyrǵan ózge sottalǵandarǵa eshqandaı narazylyǵy joq ekenin jetkizdi.

Tergeý ızolıatoryndaǵy medıtsına bóliminiń mamany da Mamaıdyń denesine zaqym kelmegenin, dene jaraqatynyń joqtyǵyn anyqtady. Ol ózi  medıtsınalyq saraptamadan ótýden bas tartqan.

Osylaısha Janbolat Mamaıdyń ómirine qaýip tóndi jáne oǵan qysym kórsetildi degen fakti rastalǵan joq.  

Atalǵan oqıǵanyń aınalasyndaǵy daý-damaıdy ýshyqtarmaý úshin Mamaı tergeý ızolıatoryndaǵy jalpy kameraǵa aýystyryldy.  

Sonymen qatar, keıbir adamdar qaýesetter men joramaldardy negizge alyp, «J.Mamaıdyń ómirine qaýip tóndi jáne oǵan qysym kórsetildi» degen jalǵan aqparatty shyǵaryp otyr.  

Osyǵan baılanysty vedomstvo BAQ ókilderinen osyǵan uqsas aqparatty basýdan buryn nemese silteme jasamaı turyp resmı túsindirme men rastaýdy alý úshin ІІM QAJ komıtetine júginýdi suraıdy.

«Sondaı-aq Qazaqstan Respýblıkasy Qylmystyq kodeksiniń 242-1-baby 3-tarmaǵyna sáıkes jalǵan málimet taratý belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp, bes júz aılyq eseptik kórsetkishke deıingi mólsherde aıyppul salý túrindegi jazaǵa alyp keletinin eskertemiz» delingen QR ІІM Qylmystyq-atqarý júıesiniń baspasóz qyzmeti taratqan habarlamada.