Prokýratýra memlekettik qyzmette jalǵan dıplommen, ári buryn isti bolǵan azamattyń jumys istep kelgenin anyqtady
ASTANA. Qarashanyń 10-y. QazAqparat - Prokýratýra organdary QR Aýyl sharýashylyǵy mınıstrliginiń Mańǵystaý oblysy boıynsha ósimdik karantıni jónindegi memlekettik ıspektory qyzmetinde jalǵan dıplommen jumys istep kelgen laýazymdy tulǵany áshkereledi,
dep habarlaıdy QazAqparat Bas prokýratýranyń baspasóz qyzmetine silteme jasap.
Atap aıtqanda, Aqtaý qalasy boıynsha tabıǵatty qorǵaý prokýratýrasy ústimizdegi jylǵy qazan aıynda Aýyl sharýashylyǵy mınıstrligi Agroónerkásiptik keshenindegi memlekettik ınspektsııa komıtetiniń Mańǵystaý oblysy boıynsha aýmaqtyq ınspektsııasynda «Jemqorlyqpen kúres týraly» jáne «Memlekettik qyzmet týraly» QR zańdarynyń qoldanylýyna tekseris júrgizip, onyń barysynda «Memlekettik qyzmet týraly» zańnyń talaptaryna qaıshy ósimdik qarantıni boıynsha memlekettik ınspektor qyzmetinde buryn isti bolǵan tulǵanyń jumys istep otyrǵanyn anyqtady.
M.Qanatov bul qyzmetke Qazaq memlekettik agrarlyq ýnıversıtetin bitirgendigi jónindegi dıplomǵa sáıkes 2006 jyly qabyldanǵan. Alaıda, Aqtaý qalasy boıynsha tabıǵatty qorǵaý prokýratýrasy 2008 jyly júrgizgen tekseris kezinde Qanatovtyń dıplomy jalǵan ekendigin anyqtady. Nátıjesinde atalmysh ınspektorǵa qatysty Aqtaý qalasynyń Іshki ister basqarmasy qylmystyq is qozǵady. Aqtaý qalalyq sotynyń 2009 jylǵy qańtardyń 1-degi úkimine sáıkes M. Qanatov QR Qylmystyq kodeksiniń 325 baby 3 tarmaqshasy boıynsha kináli dep tanylyp, oǵan 50 aılyq eseptik kórsetkish, ıaǵnı 65 myń teńge kólemindegi aıyppul túrinde jaza taǵaıyndalǵan bolatyn.
Degenmen, aıyptaý úkimi zańdy kúshine engenimen laýazymdy tulǵa alyp otyrǵan qyzmetinen bosatylmaǵan jáne oǵan osy ýaqytqa deıin jalaqy tólenip kelgen.
Prokýratýra organdary zańnamany buzýdyń atalmysh faktisin joıý boıynsha oblystyq ınspektsııaǵa túsirgen usynymnan keıin, M.Qanatov ústimizdegi jylǵy qazannyń 27-de qyzmetinen bosatyldy.
