Prokýratýra Lıonel Messı salyq tóleýden jaltardy degen aıypty joqqa shyǵardy
ASTANA. QazAqparat - Ispanııa prokýratýrasy "Barselona" oıynshysy Lıonel Messı salyq tóleýden jaltardy degen aıypty joqqa shyǵardy. Bul týraly Marca basylymy habarlady.
Alaıda aıyptaýshy tarap oıynshynyń ákesi Horhe Orasıo Messıdi salyq tóleýden jaltarý isi boıynsha 18 aıǵa bostandyǵynan aıyrýdy surady.
Prokýratýra fýtbolshynyń ústinen 2013 jyly shaǵymdanǵan. 28 jastaǵy shabýylshy men onyń ákesi shamamen €4,1 mln. salyq tóleýden jaltardy dep aıyptaldy. Prokýror aqparatynsha, oıynshy 2007, 2008 jáne 2009 jylǵy tabysynyń salyǵyn tólemegen.
Alaıda ol bul qarajatty paıdalaný sheshimine qatyspaǵandyqtan, kinásiz dep tanyldy.
Osyǵan deıin habarlanǵandaı, ataqty forvard oǵan qatysty qozǵalǵan qylmystyq isti toqtatý úshin €10 mln tóledi jáne ıspandyq qazynaǵa taǵy €15 mln tóleýge daıyn bolǵan. Alaıda jergilikti bılik muny quptamady. Foto: © EPA/ALEJANDRO GARCIA
