Prokýratýra qyzmetkerleriniń evakýatsııasy: Mına týraly aqparat BQO-da da rastalmady
Oblystyq Polıtsııa departamentiniń baspasóz qyzmetinen túsken málimetke qaraǵanda, 13 maýsym kúni saǵat 15.30-da QR Bas prokýratýrasynan oblystyq prokýratýra ǵımaratyna jarylǵysh zat qoıylǵany týraly habar túsken. Sol boıda oqıǵa ornyna tıisti qyzmetter jetip, ǵımarat qorshaýǵa alyndy.
«Ǵımarattan 42 adam evakýatsııalandy. Tekseristen keıin bomba qoıylǵany týraly habar rastalmady. QR QK 273-babyna (terrorızm aktisi týraly kórineý jalǵan habarlaý) sáıkes sotqa deıingi tergeý amaldary júrgizilýde. Atalǵan bap boıynsha aıypty dep tanylǵan adam bes myń aılyq eseptik kórsetkish mólsherinde aıyppul salýǵa ne sol mólsherde túzeý jumystaryna ne bes jylǵa deıingi merzimde bas bostandyǵyn shekteýge ne sol merzimge bas bostandyǵynan aıyrýǵa jazalanady», - dep habarlady departamenttiń baspasóz qyzmetinen.
Aıta keteıik, Aqmola jáne Soltústik Qazaqstan oblystyq prokýratýralarynyń ǵımarattaryna da jarylǵysh zattar qoıylǵany týraly aqparattar alynǵan bolatyn. Prokýratýra qyzmetkerleri dereý evakýatsııalandy. Tekseris nátıjesinde eki óńirde de qaýipti zattar anyqtalmady.
Al Almatyda telefon lańkesteri sot ǵımarattaryn «mınalaǵan». Nysandardan adamdar qaýipsiz jerge kóshirilip, kólikter qashyqtaý jerge aparyldy. Arnaıy mamandar habarlamanyń jalǵan ekendigine kóz jetkizdi.