Prokýratýra qyzmetkerleriniń arasynda til baıqaýy ótip jatyr

ASTANA. 18 qazan. QazAqparat - Búgin Astanada «Til tatýlyq tiregi» atty prokýratýra organdary qyzmetkerleri arasyndaǵy respýblıkalyq konkýrs bastaldy.

Konkýrstyń negizgi maqsaty - prokýratýra organdary arasynda memlekettik tildi keńinen nasıhattaý. Oǵan Bas prokýratýranyń, Bas áskerı prokýratýranyń, Bas kólik prokýratýrasynyń, Quqyqtyq statıstıka jáne arnaıy esepke alý jónindegi komıtetiniń, Astana qalasy jáne oblystyq prokýratýralardyń qyzmetkerleri qatysýda. Memlekettik tildi bastaýysh deńgeıde meńgergen olar 17 komanda bolyp, jarys jolyna shyqty. Konkýrs barysynda sheshendik óner, maqal-mátelderdi bilý, Abaıdyń qara sózderin mánerlep oqý sııaqty syndardan ótý kerek.