Prokýratýra quzyreti jeke zańmen belgilenetin bolady
ASTANA. QazAqparat - Konstıtýtsııaǵa ózgerister men tolyqtyrýlar engizý týraly jańa zań jobasyna saı prokýratýranyń birqatar ókilettigi alynyp tastalady. Bul týraly búgin QR Prezıdenti Ákimshiliginiń basshysy Ádilbek Jaqsybekov Parlament palatalarynyń birlesken otyrysynda málim etti, dep xabarlaıdy QazAqparat.
Otyrysta QR Parlamenti depýtaty Gleb Shegelskıı osyǵan qatysty saýal qoıǵan bolatyn.
"Men zań jobasyn birinshi oqylymda qabyldaýdy qoldaımyn jáne áriptesterimdi de osy zań jobasyn qoldaýdy usynamyn. Baıandamashydan myna máseleni anyqtaǵym keledi. Qurmetti Ádilbek Ryskeldiuly, qolda bar Konstıtýtsııanyń 83-baby 1-pýnktine sáıkes, Prokýratýra zań jáne ózge de quqyqtyq aktilerdi qabyldaýǵa narazylyq tanyta alady. Usynylǵan ózgeristerde prokýratýranyń atalmysh quzyry alynyp tastalǵan. Bul ózgerister ne úshin jasalǵanyn aıtyp berińizshi", - dep surady Shegelskıı.
Óz kezeginde, Jaqsybekov atalǵan jańashyldyqtyń basty maqsaty prokýratýra organdaryn jańǵyrtý ekenin atap ótti.
"Qazirgi zańnama tym qoıyrtpaqtalyp ketken. Negizgi zańda ol organnyń tek negizgi bazalyq quzyrlaryn qaldyrý kózdelgen. Bul - zańdy ustanýǵa qatysty joǵary qadaǵalaý, sotta memleket múddesin qorǵaý, qylmystyq qýdalaý quzyryn júrgizý. Prokýratýranyń barlyq quzyryn jeke zańnamada jiti belgileý kózdelgen. Bul óz kezeginde prokýratýra organdarynyń múmkindikterin ýaqyt talaptaryna saı jınaqy anyqtaýǵa jol ashady", - dedi Jaqsybekov.
Aıta keteıik, búgin "Parlament palatalarynyń birlesken otyrysynda QR Konstıtýtsııasyna ózgertýler men tolyqtyrýlar engizý týraly" zań jobasy talqylanýda. Otyrys basynda QR Prezıdenti baıandama jasady.
