Prokýratýra qyz alyp qashýǵa qarsy zańnyń oryndalýyn baqylap otyr - Ǵalymjan Qoıgeldıev

ASTANA. KAZINFORM — QR Bas prokýrorynyń orynbasary Ǵalymjan Qoıgeldıev Jambyl oblysynda bir top jigittiń kópshiliktiń kózinshe qyz alyp qashýy oqıǵasyna qatysty pikir aıtty.

- Jambyl oblysyndaǵy bul derek jaıynda habardarmyn. Osyǵan qatysty polıtsııa jedel áreket etip, kúdiktilerdi ustady. Qazir qylmystyq is qozǵalyp, tergeý amaldary bastaldy. Atap aıtqanda, qyz alyp qashý sııaqty is-qımyldarǵa jeke ózim qarsymyn. Otbasyn qurý osyndaı zorlyqtan bastalsa, onyń bolashaǵy qandaı bolatyny túsinikti... Elimizde tıisti zań qabyldandy. Sondyqtan prokýratýra tarapynan osy zańnynyń oryndalýyn tolyq qamtamasyz etemiz, - dedi Ǵ. Qoıgeldıev Senattyń jalpy otyrysynan keıin tilshiler suraǵyna jaýap bere otyryp.

Aıta keteıik, jaqynda Jambyl oblysynda birneshe jigitten quralǵan belgisiz top qyzdy kópshiliktiń kózinshe kólikke kúshpen otyrǵyzyp, alyp qashqan. Belgili bolǵandaı, biraz ýaqyttan keıin qyz bosatylǵan jáne zardap shekpegen. Alaıda polıtsııa bul jaǵdaı boıynsha «Adam urlaý» baby boıynsha qylmystyq is qozǵady.

Eske salaıyq, atalǵan bap boıynsha qoldanylatyn jaza bıyl kúsheıtildi. Endi adam urlaǵandar jeti jylǵa deıin bas bostandyǵynan aıyrylýy múmkin.