Prokýratýra QAJ júıesindegi zańdylyqty qadaǵalaý jumystaryn kúsheıtti
ASTANA. KAZINFORM — Prokýratýra organdary qylmystyq-atqarý júıesi mekemelerinde zańdylyqtyń saqtalýyn jáne adam quqyqtarynyń qamtamasyz etilýin júıeli túrde jalǵastyrady. Qadaǵalaý qyzmeti aıasynda penıtentsıarlyq mekemelerdi jańǵyrtý, sottalǵandardy medıtsınamen qamtamasyz etý, olardy eńbek pen qamtý jáne bosatylǵannan keıin qaıta áleýmettendirý máselelerine erekshe nazar aýdarylyp otyr. Bul týraly quzyrly organnyń baspasóz qyzmeti málim etti.
Vedomstvonyń málimetinshe, sońǵy eki jylda medıtsınalyq qamtamasyz etý salasynda QAJ mekemeleri janyndaǵy medıtsınalyq bólimderdiń ınfraqurylymy jaqsartylǵan. 54 nysanda jóndeý jumystary júrgizilip, sondaı-aq Batys Qazaqstan jáne Jetisý oblystarynda eki jańa medıtsınalyq bólim salyndy.
Óńir ákimdikterimen ózara is-qımyl sheńberinde túzeý mekemelerindegi turǵyn úı-jaılarǵa jóndeý jumystary júrgizildi. Sonymen qatar, QAJ mekemeleriniń aýmaǵynda 12 óndiristik angar salý jobasy iske asyrylyp jatyr.
Qabyldanyp jatqan sharalardyń nátıjesinde sottalǵandardy eńbekpen qamtý deńgeıi 50 paıyzdan 70-ke deıin artty.
Qaraǵandy oblysynda Qylmystyq-atqarý júıesi komıtetimen birlesken jumys kezinde qaýipsizdigi barynsha tómen mekemedegi sottalǵandardy jumys berýshiniń aýmaǵynda turýmen jáne tolyq qamtamasyz etýmen eńbekke tartý boıynsha pılottyq joba iske asyrylyp jatyr.
Búgingi tańda «Qarmet» AQ jáne «Jelezobetonnyı partner» JShS-ne jumysqa ornalastyrý úshin 51 sottalǵan shyǵaryldy. Aldaǵy ýaqytta jobaǵa qatysýshylar sanyn 500 adamǵa deıin ulǵaıtý josparlanǵan.
Qylmystyq-atqarý qyzmeti protsesterin avtomattandyrý boıynsha sharalar qabyldanýda. Mekemelerge keńeıtilgen fýnktsıonaly bar zamanaýı termınaldar engizilmek.
Jańa júıeler sottalǵandardy sáıkestendirý úshin Face-ID tehnologııasyn, sondaı-aq qujattarǵa qol qoıý úshin TouchScreen tehnologııasyn paıdalanýǵa múmkindik beredi.
— Atalǵan sheshimder ótinishterdi, izgilik aktilerin qoldaný týraly ótinishhattardy, shaǵymdar men aryzdardy memlekettik organdarǵa, onyń ishinde Adam quqyqtary jónindegi ýákilge joldaý múmkindigin qamtamasyz etedi, — delingen habarlamada.
Termınaldardy synaqtan ótkizý Aqmola jáne Almaty oblystarynyń mekemelerinde sátti júrgizilgen.
Áleýmettik paıdaly baılanystardy nyǵaıtý maqsatynda QAJ 10 mekemesinde týystarymen beınebaılanys arqyly sóılesýge múmkindik beretin beınetelefondar engizildi. Eldegi barlyq mekemelerge 416 apparat ornatý josparda bar.
Qylmystyq-atqarý júıesi mekemelerin jańǵyrtý, ustaý jaǵdaılaryn jaqsartý jáne zamanaýı tsıfrlyq sheshimderdi engizý jumystary jalǵasatyn bolady. Qabyldanyp jatqan barlyq sharalardyń iske asyrylý barysy Bas prokýratýranyń turaqty baqylaýynda.
Aıta keteıik, elde 2300-den asa qazaqstandyq jazasyn eńbekpen ótep júr.
