Prokýratýra qaıtarǵan 576,9 mln teńge: Alǵabas aýyly aýyz sýmen qamtyldy
ASTANA. KAZINFORM — Batys Qazaqstan oblysynyń Terekti aýdanyndaǵy Alǵabas aýylynda prokýratýra qaıtarǵan aktıvter esebinen ortalyqtandyrylǵan aýyz sý júıesi iske qosylyp, 200-den astam abonent sapaly aýyz sýmen qamtyldy. Joba halyqtyń ómir súrý sapasyn arttyrýǵa baǵyttalǵan áleýmettik mańyzy bar bastamalardyń biri boldy. Bul týraly Batys Qazaqstan oblysy prokýratýrasy málim etti.
Memleket basshysynyń tapsyrmasyna sáıkes prokýratýra qaıtarǵan qarajat halyqtyń ómir súrý sapasyn jaqsartýǵa baǵyttalǵan áleýmettik mańyzy bar jobalardy iske asyrýǵa jumsalyp otyr.
— Batys Qazaqstan oblysynda osyndaı jobalardyń biri — Terekti aýdanynyń Alǵabas aýylyn ortalyqtandyrylǵan aýyz sýmen qamtamasyz etý. Kóptegen jyldar boıy eldi mekende ortalyqtandyrylǵan aýyz sý júıesi bolmaǵan. Turǵyndar jyl mezgili men sýdyń sapasyna qaramastan, qudyq sýyn paıdalanýǵa májbúr boldy, — dep habarlady prokýratýradan.
2025 jyly prokýratýra qaıtarǵan aktıvter esebinen quny 576,9 mln teńgeni quraıtyn ortalyqtandyrylǵan aýyz sýmen jabdyqtaý júıesiniń qurylysy júzege asyryldy. Joba aıasynda eki sý uńǵymasy burǵylanyp, eldi mekendi turaqty sýmen qamtamasyz etýge qajetti ınjenerlik ınfraqurylym quryldy. Nátıjesinde 200-den astam abonent óz úılerinde sapaly aýyz sýǵa qol jetkizdi.
Atalǵan jobanyń iske asyrylýy — memleketke qaıtarylǵan aktıvterdiń halyq ıgiligine tıimdi baǵyttalyp, áleýmettik mańyzy bar máselelerdi sheshýge jumsalyp jatqanynyń naqty kórinisi.
Aıta keteıik, Astanada qaıtarylǵan aktıvter esebinen 1200 oqýshyǵa arnalǵan jańa mektep salynady.
