Prokýratýra kásipkerlikke qatysty zań talaptarynyń oryndalýyn baqylaýdy kúsheıtti
ASTANA. KAZINFORM — 2025 jyldyń 6 aıynda qadaǵalaý aktileri boıynsha 700-den astam kásipkerdiń quqyqtary qorǵaldy, dep habarlaıdy SQO prokýratýrasynyń baspasóz qyzmeti.
SQO prokýrorlary kásipkerlerdiń quqyqtaryn memlekettik kirister organdarynyń zańsyz áreketterinen qorǵady.
Memleket basshysynyń ákimshilik is júrgizýdi qozǵaýdy prokýrormen mindetti túrde kelisýdi kózdeıtin prokýrorlyq súzgini engizý týraly tapsyrmasyn oryndaý sheńberinde oblys prokýratýrasy ákimshilik quqyq buzýshylyq týraly Kodekstiń talaptaryn óreskel buzýshylyqtardy anyqtady. Máselen, Aqqaıyń, Ýálıhanov aýdandary men Petropavl qalasy memlekettik kirister Basqarmalarynyń laýazymdy tulǵalary kodeks talaptaryn buza otyryp, prokýrordyń kelisiminsiz óńirlik pýlǵa kiretin ınvestorlarǵa qatysty ákimshilik quqyq buzýshylyqtar týraly 17 is qozǵady («Ptıtsefabrıka «Severnyı broıler» JShS, «Búrkit» ÁKK ÓK, «ATM Petropavlovsk Hospital» JShS).
Jambyl, Mamlıýt, Taıynsha jáne de M.Jumabaev aýdandarynda tıisti ókilettikteri joq memlekettik kirister organdarynyń mamandary kásipkerlerge qatysty 30 ákimshilik quqyq buzýshylyq týraly isti qarady, al Kodekstiń talaptaryna sáıkes atalǵan isterdi qaraý jáne jaza qoldaný tek memlekettik kirister organdarynyń basshylaryna, olardyń orynbasarlaryna ne osyǵan tıisti buıryqpen ýákilettik berilgen ózge de laýazymdy tulǵalarǵa ǵana beriledi.
— Ǵ.Músirepov aýdanynda memlekettik kirister Basqarmasy basshysynyń orynbasary eskirý merzimi ótkennen keıin ÁQBtK-niń 92-1-baby (mindetti áleýmettik saqtandyrý salasyndaǵy zańnamany buzǵany úshin) boıynsha kásipkerdi jaýapqa tartý týraly zańsyz qaýly shyǵardy. Prokýrorlyq qadaǵalaý aktileri boıynsha barlyq zańsyz sheshimderdiń kúshi joıyldy, ister boıynsha is júrgizý toqtatyldy, kináli laýazymdy adamdar (onyń ishinde basshylar) tártiptik jaýaptylyqqa tartyldy. Qabyldanǵan sharalardyń nátıjesinde úsh ınvestordy qosa alǵanda, 25 kásipkerdiń quqyqtary qorǵaldy, — delingen habarlamada.
Vedomstvo málimetinshe, 2025 jyldyń 6 aıynda qadaǵalaý aktileri boıynsha 700-den astam kásipkerdiń quqyqtary qorǵaldy, jaýapkershiliktiń ártúrli túrlerine 30 laýazymdy tulǵa tartyldy.
Qadaǵalaý organy barlyq bıznes sýbektilerine olardyń quqyqtary men zańdy múddeleri buzylǵan jaǵdaıda, olar kásipkerlerdiń quqyqtaryn qorǵaý jónindegi mobıldi top arqyly prokýratýra qyzmetkerine +7-771-362-08-99 baılanys telefony arqyly habarlasyp, tikeleı júgine alatynyn eskertedi.
Budan buryn SQO-da ákimshilik zańnamany buzǵan úsh ákimge tártiptik shara qoldanylǵany belgili boldy.