Prokýratýra Kaspi Gold qoldanýshylardyń jeke málimetteri durys qorǵalmaıtynyn anyqtady
Astana qalasynyń prokýratýrasy Kaspi Gold qosymshasyn paıdalanýshylardyń derbes derekterin ashýǵa baılanysty QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń aqparattyq qaýipsizdik komıtetine usynys engizdi.
«Qaskúnemderdiń qazaqstandyqtarǵa kredıt pen mıkrokredıt rásimdeıtin alaıaqtyq jaǵdaılarynyń jıileýine baılanysty, qadaǵalaý organy derbes derekter salasyndaǵy zańnamanyń saqtalýyna jáne olardy banktik qyzmet kórsetý salasyndaǵy derbes derekterdi qamtıtyn aqparattyq júıe ıeleriniń qorǵaýyna taldaý júrgizdi. Bul taldaý Kaspi banki tarapynan Derbes derekter jáne olardy qorǵaý týraly zańnamanyń buzylǵanyn kórsetti. Dálirek aıtqanda bank Kaspi Pay mobıldi tólem júıesin ázirlegen, onyń kómegimen kásipkerler Kaspi.kz mobıldi qosymshasy men Kaspi QR arqyly tólem qabyldaıdy. Kásipkerler óz klıentterine Kaspi Pay arqyly qarajatty qaıtarǵanda Kaspi Gold-da qarajat alýshynyń jeke sáıkestendirý nómirin (JSN) kórýge bolatyn tarıh saqtalady», - dep jazylǵan prokýratýra habarlamasynda.
«Derbes derekter jáne olardy qorǵaý týraly» zańnyń 20-babynyń 1-tarmaǵyna sáıkes, derbes derekter memleket kepildik beretin qorǵaýǵa jatady.
Olardy jınaýǵa jáne taratýǵa sýbektiniń nemese onyń zańdy ókiliniń jazbasha kelisimimen ǵana jol beriledi.
Budan basqa, zańnyń 11-babynyń normalarynda menshik ıeleri jáne (nemese) operatorlar, sondaı-aq qoljetimdiligi shekteýli derbes derekterdi alatyn úshinshi tulǵalar sýbektiniń nemese onyń zańdy ókiliniń kelisiminsiz ne ózge de zańdy negizdiń bolmaýynsyz olardyń taralýyna jol bermeý talaptaryn saqtaıdy jáne qupııalylyǵyn qamtamasyz etedi dep kózdelgen.
«Alaıda, qazirgi ýaqytta Kaspi Pay tarıhynda Kaspi QR arqyly tóleý kezinde Kaspi Gold paıdalanýshylarynyń tegi, aty-jóni jáne jeke sáıkestendirý nómirlerin kórýge bolady (mobıldi qosymshany mıllıonnan astam adam paıdalanady). Osyǵan baılanysty Astana qalasynyń prokýrory Erlan Ótegenov ýákiletti organǵa aýdarymdar tarıhynan derbes derekterdi, atap aıtqanda jeke sáıkestendirý nómirin alyp tastaý týraly usynys engizdi», - deıdi prokýratýra.
