Prokýratýra qarttar men múgedekterge bólingen 20 mıllıonnan astam teńgeniń zańsyz jumsalǵanyn anyqtady
ASTANA. Maýsymnyń 24-i. QazAqparat /Aıdar Ospanalıev/ - Prokýratýra organdary memlekettik medıtsınalyq-áleýmettik mekemelerde turatyn qarttar men múmkindigi shekteýli jandardyń quqyqtarynyń saqtalýy jaǵdaıyn tekserý jumystaryn júrgizdi.
Tekserý barysynda atalmysh mekemelerde jatqan azamattarǵa bólingen qarjynyń 20 mıllıonnan astam teńgesin zańsyz jumsaý áreketi anyqtaldy. Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov aıtty.
Onyń sózine qaraǵanda, tekserýler barysynda memleket qamqorlyǵyna alǵan azamattardyń densaýlyqtary men ómirlerine qaýip tóndiretin zań buzý áreketterin anyqtady. «Al osy mekemelerdegi azamattarǵa kórsetiletin qyzmet deńgeıniń
tómendigi men azamattardyń mekemege tıisti mólsherden tys kóp ornalastyrylýy júıeli túrde oryn alyp otyrǵan kemshilikter. Mysaly, Jambyl oblysynda ornalasqan múgedekter men múmkindigi shekteýli 100 adamǵa arnalǵan №2 ınternat úıinde 300 adam turyp jatyr. Mundaı faktiler elimizdiń ózge de aımaqtarynda kóptep kezdesedi. Olardyń arasynda adamdarǵa oryn jetpegendikten olardy dálizge ornalastyrý áreketteri de anyqtaldy», dedi resmı ókil.
Onyń sózine qaraǵanda, kóptegen ınternat-úılerde memleket qamqorlyǵyna alynǵan azamattarǵa bólingen zeınetaqy men járdemaqylardy zańsyz paıdalaný jaǵdaılary oryn alǵan. «Jambyl oblysyndaǵy júıke-nevrologııalyq ınternat-úıinde qamqorlyqqa alynǵan azamattardyń esebinen 700 myń teńgege kilem alynǵan. Al Batys Qazaqstan oblysynda qoımada bar bola turǵanyna qaramastan 1,4 mıllıon teńgege jýǵysh zattar men tósek jabdyqtary satyp alynǵan. Bul rette ásirese mekeme basshylarynyń taýarlardy alaıaq ujymdardan satyp alyp otyrǵandyqtaryn erekshe atap ótý kerek», dedi N.Súıindikov.
