Prokýratýra ınvestorlardy qorǵaý jumysyn kúsheıtedi
ASTANA. KAZINFORM — Bas prokýrordyń birinshi orynbasary Jandos Ómirálıevtiń tóraǵalyǵymen ınvestorlardyń quqyqtaryn qorǵaý jáne ınvestıtsııalyq jobalardy súıemeldeýdiń biryńǵaı tásilderin engizý máseleleri boıynsha keńesi ótti.
Talqylaýǵa Investorlardyń quqyqtaryn qorǵaý komıtetiniń tóraǵasy Baýyrjan Eraly, Syrtqy ister mınıstrligi Investıtsııa komıteti tóraǵasynyń orynbasary Arman Aqsýbaev, «Kazakh Invest» UK» AQ basqarýshy dırektory Áljan Estemesov, sondaı-aq beınekonferentsbaılanys rejıminde óńir prokýrorlary men jergilikti atqarýshy organdardyń ókilderi qatysty.
Jıynda ınvestıtsııalyq jobalardy ınvestordyń alǵashqy ótinishinen bastap nysandy paıdalanýǵa bergenge deıingi barlyq kezeńde sapaly quqyqtyq súıemeldeý, sondaı-aq jobalardy ınvestorlar tizilimine ýaqytyly qosý máseleleri qaraldy.
Memlekettik organdardyń sheshimderine «prokýratýra súzgisi» mehanızmi arqyly monıtorıng júrgizýge, daýlardy sotqa deıin retteýge jáne júıeli ákimshilik kedergilerdi, sonyń ishinde jer ýchaskelerin berý, tehnıkalyq sharttardy alý jáne ınfraqurylymǵa qosylý máselelerin joıýǵa erekshe nazar aýdaryldy.
Bas prokýrordyń birinshi orynbasary Jandos Ómirálıev barlyq memlekettik organnyń úılesimdi jumysynyń mańyzdylyǵyn atap ótti.
«Bizdiń basty mindetimiz — ınvestıtsııalyq jobalardy súıemeldeý kezinde barlyq memlekettik organdardyń naqty ári júıeli is-qımylyn qalyptastyrý. Jobany iske asyrýdyń árbir kezeńinde árbir qatysýshynyń róli men jaýapkershilik aıasy naqty belgilenýi tıis», dedi ol.
Óńirlerdegi prokýrorlar úshin biryńǵaı jáne túsinikti is-qımyl tártibin qamtamasyz etý maqsatynda ınvestorlardy súıemeldeý ádistemesi ázirlendi. Ol jumystyń kezeń-kezeńimen oryndalý algorıtmin, úılestirý tetikterin jáne den qoıý quraldarynyń tizbesin bekitedi.
Investorlardyń quqyqtaryn qorǵaý komıtetiniń tóraǵasy Baýyrjan Eraly bul ádisteme ınvestıtsııalyq jobalardy iske asyrý kezindegi táýekelder men formaldy kózqarasty boldyrmaýǵa baǵyttalǵanyn aıtty.
«Bizdiń mindetimiz — ınvestıtsııalyq jobalardyń ákimshilik rásimderde tejelýine jol bermeý. Investor alǵashqy kúnnen bastap memleket zańdylyqty, onyń ınvestıtsııasynyń qorǵalýyn jáne jobanyń barlyq kezeńinde súıemeldeýdi qamtamasyz etetinin túsinýi kerek», dep túsindirdi komıtet tóraǵasy.
Ol qadaǵalaý organdary jumysynyń negizgi prıntsıpi — máselelerdi anyqtaý jáne olardy sotqa deıin sheshý ekenin atap ótti.
Keńes qorytyndysy boıynsha vedomstvoaralyq is-qımyldy kúsheıtý, ınvestorlarmen kommýnıkatsııany jaqsartý jáne olardyń quqyqtarynyń buzylýy týraly kelip túsken ótinishterge jedel den qoıýdy qamtamasyz etý tapsyryldy.
Aıta ketsek, Bas prokýratýra Nyǵmatýlınderge qatysty tergeýge túsinikteme berdi.