Prokýratýra elordalyq alaıaqtardyń áleýmettik bet-beınesin jasady
ASTANA. QazAqparat - Astana qalasynyń prokýratýrasy elordalyq alaıaqtardyń áleýmettik bet-beınesin jasady. Bul týraly brıfıng barysynda Astana qalalyq prokýratýrasy ekinshi basqarmasynyń prokýrory Erlan Baımuhambetov málim etti.
«Alaıaqtar men olardyń áleýetti qurbandarynyń áleýmettik bet-beınesi mynadaı: ádettegideı alaıaq 20-40 jas aralyǵyndaǵy er adam, orta, orta arnaýly bilimi bar, jumyssyz bolyp keledi. Al alaıaqtardyń áleýetti qurbandary erkek te áıel de bolýy múmkin. Olardyń jastary 20 men 50-diń aralyǵynda, joǵary bilimderi joq. Biraq, mol aqshalary, jyljymaıtyn, jyljıtyn múlikteri bolady», - dedi ol.
E.Baımuhambetovtiń atap ótýinshe, Astanada alaıaqtardyń arbaýyna túsetinder kóbine iri kólemde aqshalaı qarjylarynan qaǵylady. Bul saladaǵy qylmystardyń basym bóligi nesıe, jer telimderin satý, zaım týraly sharttary qamtıdy. Bul rette aıta keterligi, alaıaqtyq áreketter kóp jaǵdaıda burynnan tanys adamdardyń arasynda oryn alady.
«Buǵan qosa, alaıaqtar ózderin naqty bir iste zardap shegýshiniń paıdasyna sheshim shyǵarýǵa qabiletti adam retinde kórsetedi. Osylaısha, adamdar aldaýǵa tez erip, aqshalary men múlikterin qylmyskerge berip qoıady», - dedi prokýror.
