Prokýratýra eldegi sý qoımalarynyń jeke ıelikke berilýiniń qanshalyqty zańdy ekendigin tekserýde
ASTANA. Naýryzdyń 18-i. QazAqparat /Aıdar Ospanalıev/ - Almaty oblysynyń «Qyzylaǵash» aýylynda bolǵan oqıǵaǵa qatysty jaýapqa tartylatyn azamattardyń sany kóbeıýi de, sonymen qatar kerisinshe, azaıýy da múmkin.
Bul týraly búgin Bas prokýratýranyń resmı ókili Nurdálet Súıindikov málim etti, dep habarlaıdy QazAqparat.
Onyń sózine qaraǵanda, qazirgi tańda atalmysh oqıǵa boıynsha belsendi túrde tergeý amaldary júrip jatyr. Sonymen qatar birqatar saraptama jumystary júrgizilýde. «Osyǵan deıin aqparat quraldarynda tótenshe oqıǵaǵa qatysty «Qyzylaǵash» aýylynyń ákimi men aımaqtyń tótenshe jaǵdaılar salasynyń basshylary jáne sý qoımasynyń ıeleri jaýapqa tartylyp otyrǵandyǵy jóninde aqparttar jarııalanǵan bolatyn. Eger qosymsha jáıtter anyqtalatyn bolsa, jaýapqa tartylatyndardyń tizimi ósýi múmkin. Al ázirge saraptama jumystary men tergeý amaldarynyń qansha ýaqytqa sozylatyndyǵy jóninde qandaı da bir aqparat berý múmkin emes», dedi resmı ókil.
Onyń sózine qaraǵanda, qazir atalmysh tótenshe jaǵdaı kópshiliktiń jiti nazarynda. Osy ýaqytta Memleket basshysynyń atalmysh oqıǵanyń sebep-saldaryn anyqtaý men kináli azamattardyń barlyǵyn jaýapqa tartý jónindegi mindetteri boıynsha barlyq sharalar qolǵa alynýda. «Bul is qazir Bas prokýrordyń jeke nazarynda. Al mundaı oqıǵalardyń endigári qaıtalanbaýyn qadaǵalaý úshin elimizdiń barlyq oblystaryndaǵy sý qoımalarynyń jaǵdaılary tekseriletin bolady. Onyń barysynda birinshi kezekte sý qoımalarynyń jeke ıelikke berilýiniń qanshalyqty zańdy ekendigi jáne qoıma ıeleriniń qajetti talaptardy qanshalyqty deńgeıde oryndap otyrǵany basty nazarǵa alynady. Tekserý jumysynyń nátıjeleri kópshiliktiń nazaryna jetkiziledi», dedi N.Súıindikov.
