Prokýratýra ekstremızm men terrorızmdi nasıhattaıtyn ınternet-resýrstardy anyqtaý jáne jolyn kesý jumystaryn júrgizip jatyr

ASTANA. QazAqparat - Búginde Qazaqstan turǵyndaryna Internet arqyly dinı ekstremızm men terrorızm ıdeıalarynyń negizinen shetelden nasıhattalýy jıirek kezdesedi. Terrorıstik uıymdar kúndelikti Internet jelisi arqyly óz qatarlaryna jańa jaqtastardy tartýmen aınalysady. Túbinde terrorıstik uıymdardyń is-qımyldary jalpy álemdegi turaqtylyqty buzýǵa baǵyttalǵan, dep habarlady QR Bas prokýratýrasynyń baspasóz qyzmetinen.

Onymen kúresý úshin elimizdiń memlekettik organdary terrorlyq qaýipinen qoǵamnyń tynyshtyǵyn qamtamasyz etý sharalar júıesin pysyqtady.

Budan basqa, radıkaldy ıdeologııanyń ınternet-keńistiginde taralýyna qarsy is-qımyl - terrorlyqqa qarsy qyzmettiń asa mańyzdy jáne maǵynaly máseleleriniń biri.

Óıtkeni, onyń mindetine quqyqqa qaıshy mazmunnyń taralýyn kesý ǵana emes, sondaı-aq, ınternetti qoldanýshylarda radıkaldy ıdeıalardyń qalyptasýyna jol bermeý.

Prokýratýra organdary basqa memlekettik organdarmen birge zańsyz materıaldardyń taralýyna jol bermeý maqsatynda ekstremızm men terroızmdi nasıhattaıtyn, sondaı-aq, qoldan jasalǵan jarylǵysh qurylǵylardy jáne jarylǵysh zattardy daıyndaý boıynsha materıaldardy taratatyn ınternet-resýrstardy anyqtaý jáne jolyn kesý boıynsha jumys júrgizýde.

Osy jumys aıasynda júz myńnan astam ınternet-resýrstyń monıtorıngi júzege asyryldy.

Ekstremızm men terrorızm ıdeıalaryn nasıhattaýdyń, sondaı-aq, jarylǵysh qurylǵylardy qoldan jasaý tásilderi týraly aqparatty taratýdyń anyqtalǵan faktileri boıynsha talap-aryz jumystary júrgizildi, sondaı-aq, sotqa deıingi retteý sharalary qabyldandy.

Sońǵy bes jylda elimizdiń sottary bir myńnan astam ınternet-resýrstardyń ónimderin zańsyz dep taný týraly prokýrorlardyń jáne ýákiletti organnyń aryzdaryn qanaǵattandyryp, olardyń Qazaqstan aýmaǵynda taratylýyn toqtatty.

Sotqa deıingi tártipte ınternet-resýrstardyń ıelerimen júrgizilgen jumys nátıjesinde eki júzden astam materıal joıyldy.