Prokýratýra bıýdjet qarajatyn jymqyrýǵa jol berilmeýin qadaǵalaıtyn bolady - A.Daýylbaev

ASTANA. QazAqparat - Aqordada Bas prokýror Ashat Daýylbaev pen Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarovpen kezdesýde QR Prezıdenti Nursultan Nazarbaev Sybaılas jemqorlyqqa qarsy is-qımyldyń 2015-2025 jyldarǵa arnalǵan partııalyq baǵdarlamasy aıasyndaǵy jumysty kúsheıtýdiń mańyzdylyǵyn atap ótti.

Bul týraly Aqordanyń baspasóz qyzmetinen habarlady.

Bas prokýror partııa baǵdarlamasyn naqty iske asyrýǵa kirisip te ketkenderin málimdedi.

- Ekonomıkany odan ári damytýǵa bólingen bıýdjettik qarajatty paıdalaný barysynda zańnama talaptaryn múltiksiz oryndaý jónindegi jumys jolǵa qoıyldy. Biz ár teńgeniń tıimdi paıdalanylýyn, bul qarajatty jymqyrýǵa jol berilmeýin qadaǵalaıtyn bolamyz, - dedi A.Daýylbaev.

Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Memleket basshysy aıtqan mindetter basym mánge ıe bolatynyna toqtaldy.

- Erteńnen bastap biz ózimizdiń tolyqqandy qyzmetimizge kirisemiz. Tıisti zań qabyldandy, qazir Agenttiktiń jeke quramyn jasaqtaý jumysy júrip jatyr. Biz sybaılas jemqorlyqqa qarsy kúres baǵytynda júıeli jumysty jolǵa qoıa alatynymyzǵa senimdimin, - dedi Q.Qojamjarov.

Memleket basshysy kezdesý qorytyndysy boıynsha birqatar naqty tapsyrmalar berdi.