Prokýratýra beısbol taıaǵy men pyshaqtyń erkin satylýyna qarsylyq bildirdi
Aqtóbe oblysy boıynsha urlyq, tonaý derekteri azaımaı tur. Aqtóbe oblystyq prokýratýrasynyń apparat jetekshisi Jaslan Dáýlembaevtyń aıtýynsha, óńirde tirkelgen qylmystyń 64 paıyzy ózgeniń múlkin urlaýǵa baılanysty bolyp otyr.
«Qylmys sanyn azaıtý úshin birneshe usynys berip otyrmyz. Birinshiden, urlanǵan zattarǵa suranysty joıý qajet dep esepteımiz. Ol úshin qara metall tapsyrý, akkýmýlıator qabyldaý oryndaryn baqylaýǵa alyp, jeke kýáligi joq adamdarmen baılanysty úzýge keńes beriledi. Lombardtarda beınekamera bolady, altyn buıymdaryn tapsyrýshylardyń jeke kýáligi suralady. Al baspahanalar taýarlardyń markasy men altyn buıymdardyń baǵasyn jazýǵa arnalǵan qaǵazdy shyǵarmaýy tıis. Jeke kásipkerlermen arada memorandým bar»,- dedi Aqtóbe oblystyq prokýratýrasynyń apparat jetekshisi Jaslan Dáýlembaev.
Prokýratýra qylmystyń aldyn alý úshin bazarlar men saýda úılerindegi qaýipsizdikti kúsheıtýdi tapsyrdy. ıAǵnı, satýshylar qyraǵy bolyp, urlyqshyny ózi ustap, polıtsııa shaqyrýy tıis. Ári kúzetshiler tek saýda býtıkterin emes, halyqtyń qaýipsizdigin qamtamasyz etýdi úırenýi shart. Aqtóbede ótken «Qoǵam jáne qaýipsizdik» jıynynda Aqtóbe prokýratýrasy kez kelgen jerde pyshaq, báki satýǵa tyıym salý qajet ekenin aıtty. Ári beısbol taıaqshasynyń satylǵanyna qarsy. Sebebi, Aqtóbede sporttyń bul túri damymaǵan, suranys ta joq. ıAǵnı, qazir beısbol taıaqshasy qylmys jasaý quralyna aınalyp ketken.
«Keıbiri urlyqty tabys kózine aınaldyrǵan. Tipti, tergeý kezinde de urlyq jasaıdy. Shynyn aıtqanda, ondaı adamdar esirtkige táýeldi bolyp keledi. Olar aýrý, sol qorytyndyǵa sáıkes medıtsınalyq kómek kórsetilýi tıis. Óz erkimen emdelmese, májbúrli túrde barýǵa sheshim shyǵarǵan jón. Óńirde pyshaq ustaý qalypty qubylysqa aınaldy. Qoǵam, ata-ana oǵan nazar aýdarmaıdy. Bıyl mektep túlegi dál osylaı qylmys jasady. Mundaı derek az emes. Biz joǵary synyp oqýshylary men orta arnaýly jáne joǵary oqý oryndary arasynda qurdastarymen aradaǵy qarym-qatynasty saqtaý, máseleni beıbit jolmen sheshý joldaryn úıretýdi, túsindirýdi usynamyz. Sýyq qarý ustaý - álsizdiń isi ekenin uǵyndyrǵan jón. Bul zańsyz ekenin bilýi tıis»,- dedi J.Dáýlembaev.
Aqtóbe polıtsııasy qoǵamdyq baqylaýdy kúsheıtýdi suraıdy. Qoǵamdyq kómekshilerge áleýmettik kómek qarastyrylsa, ákimshilik, qylmystyq quqyqbuzýshylyqtyń aldyn alýǵa bolady.
«Aqtóbe qalasyndaǵy 24 arnaıy orta jáne joǵary bilim berý mekemelerinde 314 stýdent qoǵamdyq kómekshi atandy. Olar ýchaskelik ınspektorlarmen birge oqý oryndaryndaǵy tártipti baqylaıdy. Qoǵamdyq kómekshilerdiń quqyǵy zań aıasynda qorǵalmaǵan. Olar qyzmet aıasynda jaraqat alsa, saqtandyrý jumystary júrgizilmeıdi. Qoǵamdyq kólikte júrýge jeńildik qarastyrylmaǵan. Іshki ister departamenti osy baǵytta zańǵa ózgertýler men tolyqtyrýlar engizýge usynystar jiberdi»,- dedi oblystyq ІІD bastyǵynyń orynbasary Abzal Shotanov.