Prokýratýra bazardaǵy maldy qatań tekserýdi talap ete bastady - OQO
Prokýrorlar bergen málimetterge súıensek, tek sońǵy 5 jyldyń ishinde oblysta mal urlyǵyna qatysty 9 myńnan astam qylmys tirkelse, urlanǵan maldyń sany 35 myńnan asyp ketken. Osylaısha barymtashylar ońtústik turǵyndaryn eń negizgi kúnkóris kózinen aıyrǵan.
«Mal urlyǵyna nátıjeli tosqaýyl» jobasy aıasynda urlanǵan maldyń saýdaǵa salynýy jáne olardyń eti men ónimderin zańsyz tasymaldaýdyń jolyn kesý maqsatynda qadaǵalaýshy organ ókilderi Túlkibas aýdanynda - 4, Túrkistanda - 2 jáne Sozaq aýdanynda - 1 veterınarlyq beketteriniń uıymdastyrylýyna muryndyq boldy.
«Maqtaaral, Qazyǵurt aýdany prokýrorlarynyń usynysymen jergilikti bıýdjetten «Saqshy» tobyn qurýǵa jáne statsıonarlyq beket ornatý úshin tıisti qarjy bólindi. Sonymen qosa, Saryaǵash aýdanynda, mal basyn birdeılendirilýin tekserýge arnalǵan tehnıkalyq quralmen jabdyqtalǵan 5-jyljymaly beket jumys jasaýda. Aýdannyń eń iri mal bazarynda on-laın rejımde jumys jasaıtyn 4 beınebaqylaý kamerasy ornatylǵan», - deıdi oblys prokýkororynyń orynbasary Ábil Qojahmetov.
Prokýrordyń sózinshe sońǵy jarty jyl kóleminde mal basyn zańsyz tasymaldaýdyń 100 faktisi anyqtalyp, 10 tonnadan astam et ónimderi saýdadan alynǵan. 20 mal bazary ıelerimen kelisim-memorandýmǵa qol qoıylyp, ıesiz júrgen maldy ýaqytsha ustaıtan 13 oryn quryldy. veterınarııa salasy boıynsha 58 laýazym ıesiniń tártiptik jaýapkershiligi sheshilgen. Aýqymdy sharalardyń arqasynda óńirde mal urlyǵy 37,5 paıyzǵa tómendegen.
