Prokýratýra balalardyń quqyqtaryn qorǵaýǵa arnalǵan «Sanaly urpaq» tsıfrlyq jobasyn iske qosty
ASTANA. KAZINFORM – Bas prokýratýra balalardyń quqyqtaryn qorǵaý jáne quqyq buzýshylyqtardyń aldyn alý baǵytynda «Sanaly urpaq» tsıfrlyq jobasyn iske asyryp jatyr.
Vedomstvonyń málimetinshe, Bas prokýror Berik Asylovtyń tapsyrmasymen elimizdiń barlyq óńirinde kámeletke tolmaǵandardyń tsıfrlyq profılaktıkalyq kartasyn qalyptastyrý kózdelgen. Júıe táýekel tobyna jatatyn balalardy erte anyqtap, quqyq buzýshylyq jasalǵanǵa deıin aldyn alý sharalaryn qabyldaýǵa múmkindik beredi.
Joba alǵash ret Astanadaǵy úsh kolledjde synaqtan ótkizilgen. Taldaý nátıjesinde jasóspirimder qylmystylyǵynyń negizgi sebepteri retinde bilim alý maqsatyndaǵy kóshi-qon, kámeletke tolmaǵandardy profılaktıkalyq esepke ýaqytyly qoımaý jáne ata-analardyń baqylaýynyń jetkiliksizdigi anyqtalǵan. Sondaı-aq úsh kolledjdiń ózinde tirkeýsiz turyp, memlekettik organdardyń nazarynan tys qalǵan 45 stýdent belgili bolǵan.
«Júıe táýekel tobyna jatatyn balalardy der kezinde anyqtap, quqyq buzýshylyq jasalǵanǵa deıin qajetti aldyn alý sharalaryn qabyldaýǵa múmkindik beredi», – dep málimdedi Bas prokýratýra.
Sonymen qatar elordadaǵy túngi oıyn-saýyq oryndarynyń birinde júrgizilgen profılaktıkalyq reıd barysynda 171 kámeletke tolmaǵan anyqtalǵan. Olardyń 108-i mektep oqýshysy, 63-i kolledj stýdenti. Barlyǵy polıtsııaǵa jetkizilip, kináli tulǵalar jaýapkershilikke tartylǵan, al oıyn-saýyq mekemesiniń qyzmeti toqtatylǵan.
Profılaktıkalyq jumysty jetildirý máseleleri Bas prokýratýrada ótken vedomstvoaralyq keńeste talqylandy. Keńeske Oqý-aǵartý mınıstrligi, Іshki ister mınıstrligi, oblys prokýrorlary, óńir ákimderiniń orynbasarlary jáne ózge de ýákiletti organdardyń ókilderi qatysty.
Keńeste elimizde jasóspirimder qylmysynyń deńgeıi 5%-ǵa tómendep, 1 110-nan 1 061 jaǵdaıǵa deıin azaıǵany aıtyldy. Jyl basynan beri 6 myńnan astam profılaktıkalyq reıd ótkizilip, 2 myńǵa jýyq kámeletke tolmaǵan profılaktıkalyq esepke alynǵan.
«Qazirgi ýaqytta býllıng, zorlyq-zombylyq jáne psıhologııalyq qolaısyzdyq balalar arasyndaǵy sýıtsıdtiń negizgi sebepterine aınalyp otyr», – dep atap ótti keńeske qatysýshylar.
Keńes qorytyndysynda árbir balanyń ómiri men densaýlyǵyn, quqyqtaryn qorǵaý memlekettiń basty basymdyǵy ekeni jáne bul baǵytta turaqty nátıjege otbasy, mektep, qoǵam men memlekettik organdardyń birlesken jumysy arqyly ǵana qol jetkizýge bolatyny atap ótildi.
Aıta keteıik, prokýratýra jyl saıyn 1 mıllıonnan astam balanyń quqyǵyn qorǵaıdy.
