Prokýratýra Atyraýdaǵy balyqtardyń qyrylýyn tekserýge kiristi
ATYRAÝ. QazAqparat - Atyraýda ózendegi balyqtardyń qyrylý sebebin anyqtaýǵa tabıǵatty qorǵaý prokýratýrasy kiristi, dep habarlaıdy QazAqparat tilshisi.
Atyraý qalasynyń aýmaǵyndaǵy Peretask ózeninde balyqtar qyrylyp jatqany týraly habarlaǵan bolatynbyz. Jergilikti turǵyndardyń áleýmettik jelidegi jazbalarynan keıin ol jerge ekologtar men Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasynyń qyzmetkerleri barǵan.
«Negizinen qylyshbalyq pen aqtabandar qyrylǵan. Qansha balyq qyrylǵany anyqtalyp jatyr. Olardyń barlyǵy mehanıkalyq zaqymdaný saldarynan ólgen. Bul ózen Atyraý Jylý elektr ortalyǵyna tehnıkalyq qajettilikter úshin sý jetkizetin kanalmen qosylǵan. Keıin sý sorǵylar arqyly ózenge qaıtyp keledi», - deıdi Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Aqjan Zulharova.
Atap ótilgendeı, kinálilerdi taýyp, keltirilgen zalaldy anyqtaý maqsatynda tabıǵatty qorǵaý prokýratýrasy tekseris júrgizip jatyr.
