Prokýratýra Atyraý munaı óńdeý zaýytyna keshendi tekserý júrgizip jatyr
ATYRAÝ. KAZINFORM – Prokýratýra Atyraý munaı óńdeý zaýytyna ekologııalyq zańnama talaptarynyń saqtalýyna qatysty tekserý júrgizip jatyr. Oǵan Atyraý qalasynda aýanyń lastaný faktileriniń tirkelýi, qala turǵyndarynyń jaǵymsyz ıis pen atmosferaǵa taralatyn zııandy zattarǵa qatysty shaǵymdary sebep bolǵan.
Mamandandyrylǵan tabıǵat qorǵaý prokýratýrasy oblys prokýratýrasynyń tapsyrmasyna sáıkes «Atyraý munaı óńdeý zaýyty» JShS qyzmetine tekserý bastaǵan. Oǵan Ekologııa, Sanıtarlyq-epıdemıologııalyq baqylaý jáne Tótenshe jaǵdaılar departamentiniń ókilderi jáne tıisti mamandar qatysyp jatyr.
Prokýratýranyń málimetinshe, tekserý 2026 jyldyń 8 qazanynda taǵaıyndalyp, 30 jumys kúnine josparlanǵan. Qazirgi ýaqytta tekserý jalǵasyp jatyr.
- Tekserispen ekologııalyq zańnama talaptarynyń saqtalýyna, lastaýshy zattar shyǵaryndylarynyń zańdylyǵyna, emıssııalar normatıvteriniń oryndalýyna jáne qorshaǵan ortaǵa teris áserdi tómendetý jónindegi is-sharalardyń iske asyrylýyna, sondaı-aq óńirdiń ekologııalyq ahýalyna áser etetin faktorlaryna baǵa beriledi,-dedi mamandandyrylǵan tabıǵat qorǵaý prokýrory Mıras Jalmýrzın.
Qazir tekserýge qatysqan mamandar tıisti qorytyndy daıyndap jatyr. Prokýratýra tekserý nátıjesi týraly anyqtamamen tanysqannan keıin zańǵa sáıkes sheshim qabyldanatynyn habarlady.
Buǵan deıin Atyraý munaı óńdeý zaýytynyń qubyrynan shyqqan qara tútinge uqsas qoıý bý áleýmettik jelide qyzý talqylanǵany jóninde jazǵan edik. Kásiporyn ókilderi onyń sý býy ekenin málimdedi.
Eske salaıyq, ekologııa departamenti Atyraý munaı óńdeý zaýytyn jospardan tys tekseris júrgizip, birqatar talaptyń buzylǵanyn anyqtaǵan edi. 2026 jyldyń 25 tamyzynda jáne 2-7 qyrkúıegi aralyǵynda kúkirtti qalpyna keltirý qondyrǵysynda (QKQ) jáne katalıtıkalyq krekıng qondyrǵysynda (KKQ) bolǵan tótenshe jaǵdaılar nátıjesinde alaý qondyrǵysyna apattyq gaz shyǵaryndylary bolǵany anyqtaldy. Osy kezeńderde jaǵylǵan gazdyń jalpy massasy 100 tonnadan asqan.
Keıin kásiporyn tekseris nátıjesine qatysty óz ustanymyn jarııalady.