Prokýratýra atynan jasalǵan jalǵan beınerolık boıynsha tekserý bastaldy
ASTANA. KAZINFORM — Bas prokýratýra azamattardy medıa-keńistikte taralyp, 240 myńnan asa qaralym jınaǵan «onlaın I konsýltatsııa berý jáne qoldaý quqyǵy» dep atalatyn beınerolık týraly eskertti.
Onda azamattarǵa aqshalaı qarajatty qaıtarýǵa memlekettik organnyń atynan járdemdesý usynylady.
— Atalǵan beınematerıal jasandy ıntellekt (dıpfeık) tehnologııalaryn paıdalana otyryp jasalǵany jáne keıinnen aqsha qarajatyn jymqyrý maqsatynda azamattardy adastyrýǵa baǵyttalǵany anyqtaldy. Bul rette Qazaqstan Respýblıkasynda osy beınerolıkte atalǵan «Investıtsııalardy baqylaý agenttigi» dep atalatyn memlekettik organ joq ekenin habarlaımyz, — deıdi quzyrly organdar.
Quqyq qorǵaý jáne memlekettik organdar qyzmetkerleriniń beınelerin osyndaı materıaldarda paıdalaný azamattardyń alaıaqtyq shemalarǵa degen senimin arttyrýdyń bir joly sanalady.
— Bas prokýratýranyń tapsyrmasy boıynsha Іshki ister mınıstrligi atalǵan beınematerıaldy daıyndaýǵa jáne taratýǵa qatysy bar adamdardy anyqtaýǵa, olardy keıinnen zańnamaǵa sáıkes jaýapqa tartýǵa baǵyttalǵan tekserý uıymdastyrdy, — delingen habarlamada.
Bas prokýratýra azamattardy qyraǵy bolýǵa, áleýmettik jelilerde, messendjerlerde jáne ózge de ınternet-resýrstarda taratylatyn aqparatqa synı kózqaraspen qaraýǵa, sondaı-aq kúmándi siltemelerdi ashpaýǵa jáne jeke derekterdi ne aqshalaı qarajatty úshinshi tulǵalarǵa bermeýge shaqyrady.
— Memlekettik organdar messendjerler, áleýmettik jeliler nemese bógde onlaın-platformalar arqyly aqsha qarajatyn qaıtarý boıynsha qyzmet kórsetpeıtinin esterińizge salamyz. Mundaı faktiler anyqtalǵan jaǵdaıda quqyq qorǵaý organdaryna dereý júginýdi nemese 102-ge habarlaýdy suraımyz, — dep eskertti vedomstvo.
Osydan buryn ıslamda dıpfeık tehnologııasyn aldaý men zııan úshin qoldanýǵa tyıym salynatyny habarlandy.
