Prokýratýra Astananyń qoǵamdyq kólikterinde óreskel zań buzýshylyqtardy anyqtady
ASTANA. 21 qyrkúıek. QazAqparat - Astana prokýratýrasy «Astana - absolıýtti zańdylyq aýmaǵy» degen atpen ótken aktsııanyń qorytyndysyn shyǵardy. Vedomstvonyń baspasóz qyzmetinen habarlaǵandaı, shara barysynda qadaǵalaý organdary elordadaǵy jolaýshylar tasymaldaýda qaýipsizdiktiń saqtalýyn baqylaýda iri kólemdegi tekserister ótkizdi.
Onyń barysynda, júrgizýshilerdiń jol júrý erejesin óreskel buzatynyn, JKO oryn alǵan jerden izderin jasyryp, apattyq jaǵdaılardyń bolýyna sebepker bolyp, tipti kólikke mas kúıinde otyratyndar bar ekenin anyqtady. Ótken jyly jol polıtsııasy avtobýs júrgizýshileriniń jol júrý erejesin buzýyna qatysty 1659 faktini tirkegen. Bıylǵy jyly 633 zań buzýshylyq tirkeldi.
«Qalanyń prokýratýrasy men Astananyń jol polıtsııasy basqarmasy birlesip, bes kún boıy «Avtobýs» jedel aldyn alý sharasyn ótkizdi. Osy ýaqyt aralyǵynda qoǵamdyq kólik júrgizýshileri men jolaýshylar tasymalymen aınalysatyn jaýapty tulǵalarǵa qatysty 113 ákimshilik quqyq buzýshylyq anyqtaldy», - dep málimdedi baspasóz qyzmetinen.
Statıstıkalyq málimetterge sáıkes, ótken jyly 494 JKO tirkeldi. Onyń saldarynan 57 adam qurban bolyp, 514 adam jaraqattandy. Avtobýstardyń qatysýymen 35 JKO oryn aldy, 7 adam qaza bolyp, 44-i zardap shekti. Osy jyldyń basynan beri avtobýstar 15 ret apatqa ushyraǵan. Abyroı bolǵanda, zardap shekkender joq, alaıda, 2011 jyldyń sáıkes kezeńimen salystyrǵanda jaraqat alǵandar sany 13 adamǵa kóp.
