Prokýratýra: Astana irgesinde atys jasaǵan - «Qazsýshardyń» burynǵy bas dırektory

ASTANA. QazAqparat - Búgin Aqmola oblysy Tselınograd aýdany prokýratýrasynyń ǵımaraty janynda quqyq qorǵaý organdarynyń qyzmetkerlerine  qarýly shabýyl jasaldy, dep habarlaıdy Aqmola oblysy prokýratýrasynyń baspasóz qyzmeti.

Onyń saldarynan prokýratýra qyzmetkeri J.Álibaev jáne Tselınograd aýdany ishki ister bóliminiń tergeýshisi A.Pshembaev oq jaraqatyn aldy.

Qarýly shabýyldy qylmystyq is boıynsha sottalýshy bolyp tabylǵan O.A.Jampozov  jasady.

Іs boıynsha O.A.Jampozov QR AShM «Qazsýshar» RMK ShJQ dırektory bola tura, basqa laýazymdy tulǵalarmen jáne merdigerlermen  aldyn ala sóz baılasý arqyly, ózine senip tapsyrylǵan Preobrajenskoe sý qubyryn jóndeý úshin bólingen 620 mln. teńge kóleminde qarajatty  talan-tarajǵa saldy dep aıyptaldy.

Jampozovqa qatysty kepil túrindegi bultartpaý sharasy qoldanylǵan.

Qarýly shabýylǵa ushyraǵan prokýror sottalýshy Jampozovtyń qylmystyq isi boıynsha sotta memlekettik aıyptaýshy bolǵan.

Іs boıynsha sot otyrysy ashyq túrde ótken.

2017 jyldyń 18 shildesinde sot jaryssózderi barysynda memlekettik aıyptaýshy Jampozovty kináli dep tanýdy jáne oǵan QR «Raqymshylyq jasaý týraly» Zańnyń erejesin qoldana otyryp, 5 jylǵa bas bostandyǵynan aıyrý jazasyn taǵaıyndaýdy suraǵan.

Úkimniń jarııalanýy 2017 jyldyń 20 shildesi saǵat 16:00-ge taǵaıyndalǵan.

Qarýly shabýyl sot úkiminiń jarııalanýyna deıin oryn aldy.

Shabýyl jasaǵannan keıin Jampozov qylmys ornynan boı tasalaǵan.

Kóp uzamaı onyń avtokóligi ALJIR qýǵyn-súrgin qurbandary memorıaldy kesheniniń mańynan tabyldy. Kólikten Jampozovtyń máıiti de tabyldy.

Aldyn ala boljam boıynsha, ol óz-ózine qol jumsaǵan.

Jaraqat alǵan qyzmetkerler aýrýhanaǵa jetkizildi.

Іstiń tergelýin qadaǵalaý Astana qalasy prokýratýrasyna tapsyryldy.