Prokýratýra apatty jaǵdaıda qonǵan «Bek Eır» ushaǵyna qatysty oqıǵany tergeýdi bastady
«27 naýryzda 10 saǵat 36 mınýtta Astana qalasynyń áýejaıyna «Qyzylorda-Astana» baǵytyndaǵy №2041 reısin oryndaý kezinde «Bek Eır» áýe kompanııasynyń «Foker-100» markaly áýe ushaǵy apatty jaǵdaıda qondy», delingen habarlamada.
Prokýratýranyń habarlaýynsha, áýe kemesiniń apattyq qonýyna onyń aldyńǵy shassı tireginiń ashylmaýy sebep bolǵan.
Ushaq bortynda 121 adam, onyń ishinde 116 jolaýshy jáne 5 ekıpaj músheleri bolǵan. Oqıǵadan eshkim zardap shekpegen.
«Atalǵan derek Bas kólik prokýratýrasynyń sotqa deıingi tergep-tekserýlerdiń biryńǵaı tizilimine Qylmystyq kodekstiń 344-babynyń 1-tarmaǵymen (kólik júrisi nemese olardy paıdalaný qaýipsizdigi qaǵıdalaryn buzý) tirkeldi», delingen habarlamada.
Qylmystyq is Bas kólik prokýratýrasynyń arnaıy prokýrorlarynyń óndirisine qabyldanyp, sotqa deıingi tergep-tekserý júrgizilýde.
Eske sala ketsek, Bek Air áýe kompanııasy bort ekıpajyn ıaǵnı, komandır - Dmıtrıı Rodın men ekinshi ushqysh - Vadım Smerechanskııdi memlekettik marapatqa usynatyndyǵyn málimdegen. Keıinnen oqıǵa ornyna baryp qaıtqan QR Investıtsııalar dáne damý mınıstri
Áset Isekeshev óziniń Feısbýktegi paraqshasynda osyndaı bastama kóterdi.
«Jańa ǵana áýejaıdan shyqtyq. Qudaı saqtap eshkim zardap shekpedi. Sońǵy jolaýshylar evakýatsııalaý kezinde salonda qaldyrǵan qol júkterin alǵan soń ketip qaldy. Arnaıy komıssııa oqıǵany tekserýge kiristi. Ekıpajdyń ásirese komandırdiń sheberligi men qaısarlyǵyn, sondaı-aq barlyq jerdegi qyzmetterdiń úılesken jumystaryn atap ótkim keledi. Ekıpajdy memlekettik jáne vedomstvolyq nagradalarǵa usynatyn bolamyz», delingen jazbada.