Prokýratýra alaıaqtar jıi qoldanatyn tásilderin atady
ASTANA. KAZINFORM – Astana qalasynyń kommýnıkatsııalar qyzmeti alańynda ótken baspasóz máslıhatynda Nura aýdany prokýratýrasy bóliminiń bastyǵy Shahrıramadan Sultan aýdan turǵyndary jıi tap bolatyn alaıaqtyq túrleri týraly aıtty.
Onyń aıtýynsha, qazirgi tańda turǵyndar arasynda qyzmet kórsetý nemese belgili bir jumysty oryndaý syltaýymen aqsha alyp, keıin mindettemesin oryndamaý, satyp alý-satý mámileleri kezinde aldaý, sondaı-aq múlikti jalǵa berý barysynda jasalatyn alaıaqtyq faktileri jıi kezdesedi.
– Sońǵy jyldary ınternet-alaıaqtyq keńinen tarap keledi. Alaıaqtar Instagram, WhatsApp, Telegram sııaqty áleýmettik jeliler men messendjerlerdi, jalǵan ınternet-platformalar men saıttardy, fıshıngtik SMS-habarlamalardy paıdalanady. Sondaı-aq ózderin ekinshi deńgeıli bank nemese memlekettik organ qyzmetkeri retinde tanystyryp, azamattardy aqshasyn basqa esepshotqa aýdarýǵa nemese SMS arqyly kelgen rastaý kodyn aıtýǵa kóndiredi. Mundaı kodtardy eshkimge aıtýǵa bolmaıdy, – dedi Shahrıramadan Sultan.
Spıkerdiń sózinshe, alaıaqtar jıi qoldanatyn aılalardyń biri – týrıstik týrlar men joldamalardy satý. Olar áýe bıletteri, qonaqúı men demalys qyzmetteri úshin aldyn ala tólem qabyldaǵanymen, is júzinde eshqandaı qyzmet kórsetpeıdi.
Budan bólek, áleýmettik jelilerdegi habarlandyrýlar arqyly fotoapparattar men ózge de tehnıkalardy jalǵa alyp, keıin olardy ıesine qaıtarmaı, lombardqa ótkizý nemese qaıta satý faktileri de kezdesedi. Sondaı-aq YouTube pen áleýmettik jelilerde oqytý kýrstary nemese trenıngter retinde usynylatyn jalǵan ınvestıtsııalyq jobalar arqyly azamattardy aldaý jaǵdaılary kóbeıip otyr.
Shahrıramadan Sultannyń aıtýynsha, qarjylyq jáne turmystyq qyzmetterdiń tsıfrlandyrylýy qylmysty qashyqtan jasaý múmkindigin keńeıtip, osy sanattaǵy quqyq buzýshylyqtardyń jyl saıyn artýyna yqpal etip otyr.
Sonymen qatar ol osyǵan baılanysty prokýratýra organdary profılaktıkalyq jumystardy turaqty júrgizedi. Taqyryptyq beınerolıkter ázirlenip, mektepterde, joǵary oqý oryndary men kolledjderde, eńbek ujymdary arasynda jáne alaıaqtardyń arbaýyna jıi túsetin zeınetkerlerge túsindirý kezdesýleri men dárister ótkiziledi dep atap ótti.
Buǵan deıin alaıaqtar JI kómegimen tanymal tulǵalardyń beınesin paıdalanyp júrgenin jazǵanbyz.
