Prokýratýra Aqjarqyn Turlybaıdy Qytaıdan qaıtarý týraly: Jaqynda oń sheshim bolyp qalady

ASTANA. KAZINFORM – QR Bas prokýrorynyń orynbasary Ǵalymjan Qoıgeldıev Qytaıda sottalǵan Aqjarqyn Turlybaıdy Qazaqstanǵa qaıtarý kelissózderi jalǵasyp jatqanyn aıtty.

Búgin Senattyń jalpy otyrysynan keıingi baspasóz máslıhatynda tilshiler: «Áleýmettik jelide Aqjarqyn Turlybaı Qazaqstanǵa oraldy degen aqparat jarııalandy. Bul qanshalyqty ras?» — dep suraǵan edi.

Óz kezeginde Ǵalymjan Qoıgeldıev qazir QR Syrtqy ister mınıstrligi men Bas prokýratýra Qazaqstan azamatyn Qytaıdan qaıtarýǵa bar kúsh-jigerin salyp jatqanyn aıtty.

«Bul jumys toqtamady, ıaǵnı belsendi túrde atqarylyp jatyr. Jaqyn arady bul jaǵdaı boıynsha oń sheshim bolyp qalady dep senemin. Atap aıtqanda, bul baǵytta jumystar ońaı emes», — dedi Bas prokýrordyń orynbasary.

Onyń sózine qaraǵanda, buǵan deıin Aqjarqyn Turlybaı jazasyn Qazaqstanda óteýge qatysty aryzyn joldaǵan.

Aıta ketý kerek, Aqjarqyn Turlybaı 2014 jyldyń naýryz aıynda Qytaıdyń Malaızııamen shekarasynda esirtkimen ustalǵan bolatyn. 

Onyń júk sómkesinen 4,5 keli esirtki tabylyp, Aqjarqyn bul týraly bilmeıtinin málimdegen. Osy is boıynsha Qytaıdyń Gýanchjoý soty Aqjarqyn Turlybaıdy esirtki kontrabandasymen aıyptap, ómir boıyna bas bostandyǵynan aıyrdy.