Prokýratýra Aqtóbedegi lager tárbıeshisiniń qaı bap boıynsha aıyptalyp jatqanyn aıtty
AQTÓBE. QazAqparat - Aqtóbede balalarǵa tıisti degen kúdikke ilikken «Aqbóbek Vostok» lageriniń tárbıeshisi jumystan shyǵaryldy. Al prokýratýra oǵan qatysty qaı bap boıynsha qylmystyq is qozǵalǵanyn málimdedi, dep habarlaıdy QazAqparat tilshisi.
25 shilde kúni polıtsııaǵa habar kelip, tergeý bastalǵan.
Lager basshysy Aıbolat Tashkenovtyń aıtýynsha, tálimger jumystan shyǵarylǵan. Al ózge tálimgerler áriptesteriniń oǵash qylyǵyn baıqamaǵan.
«Ony tek jaqsy adam retinde tanımyn. Jaqsy maman, bilikti azamat. Nur - Sultan qalasyndaǵy «Shabyt» akademııasynda kıno jáne teatr akteri mamandyǵy boıynsha bilim alyp júr. Telearnada jumys istedi dep estidim», - dedi tálimger Ýálıhan Kenjebaev.
Aıta keteıik, ázirge lager quryltaıshylary jan-jaqty aqparat taratpaı otyr.
«Qylmystyq Kodekstiń 124-baby, ıaǵnı, «Jas balalardy azǵyndyq jolǵa túsirý» babymen is qozǵaldy», - dedi Aqtóbe qalasy Almaty aýdandyq prokýrory Jasulan Dáýlembaev.
