Prokýratýra 600 mln AQSh dollarynan astam sheteldik ınvestıtsııany qorǵaýǵa yqpal etti
ASTANA. KAZINFORM – Aqmola oblysynda prokýratýranyń yqpalymen halyqaralyq «Zijin Mining» kompanııasynyń iri ınvestıtsııalyq jobasyn iske asyrýǵa kedergi keltirgen rásimdik másele sheshildi.
Joba aıasynda jylyna 10 mln tonna ken óńdeıtin altyn óndirý fabrıkasyn salý kózdelgen. Sheteldik ınvestıtsııa kólemi 600 mln AQSh dollarynan asady.
Jobanyń iske asyrylýy eldiń ónerkásiptik áleýetin nyǵaıtýǵa, jańa jumys oryndaryn ashýǵa jáne salyq túsimderin ulǵaıtýǵa múmkindik beredi.
Uzaq ekologııalyq rásimder daıyndyq jumystaryn 2027 jylǵy sáýirge deıin keıinge qaldyryp, qurylys merzimderiniń sozylýyna ákelýi múmkin edi.
Prokýratýranyń bastamasymen ýákiletti organ mindetti qorshaǵan ortaǵa áserdi baǵalaýdy júrgizbeı, ekologııalyq baǵalaýdyń ońaılatylǵan tártibin qoldaný týraly sheshim qabyldady.
Osylaısha, ekologııalyq talaptar saqtala otyryp, ınvestıtsııalardy ıgerý merzimine áser etken kedergi joıyldy.
– Qajetti rásimderdiń aıaqtalýy jáne jobanyń iske asyrylýy oblys prokýratýrasynyń baqylaýynda, - delingen habarlamada.