Prokýratýra: 6 jetisýlyqtyń alıment boıynsha qaryzy 20 mıllıon teńgeden asyp ketken

ASTANA. KAZINFORM — Jetisý prokýratýrasy alıment tólemegen boryshkerlerdi qylmystyq jaýapkershilikke tartýdy talap etip otyr, dep habarlaıdy vedomstvonyń baspasóz qyzmeti.

Oblystyq prokýratýranyń úılestirýimen alıment boıynsha boryshkerlermen qylmystyq qýdalaýǵa deıin belsendi jumys júrgizilýde.

Qadaǵalaý organy keıbir boryshkerdiń ákimshilik jaýapkershilik sharalaryna múlde mán bermeıtinin jáne birneshe ret jaýapkershilikke tartylǵanyna qaramastan, óz balalaryn qamtamasyz etý úshin alıment tóleýden jaltaryp júrgenin atap ótti.

— Máselen, alty boryshkerdiń úsh jyldan astam ýaqyt boıy sot sheshimin qasaqana oryndamaý saldarynan óz balalary aldyndaǵy qaryzdarynyń jalpy somasy 20 mıllıon teńgeden asyp ketken. Sol sebepti prokýrorlar olarǵa qatysty QR QK-niń 139-baby boıynsha balalardy jáne basqa da eńbekke jaramsyz otbasy múshelerin asyraýǵa qarajat tóleý jónindegi mindetterdi oryndamaǵany úshin qylmystyq jaýapkershilikke tartý syndy qatań sharalardy qoldana bastady. Atalǵan tulǵalardyń úsheýine qatysty qylmystyq ister sotqa joldanylyp, olardyń biri boıynsha aıyptaý úkimi shyǵaryldy jáne kináli adam sottaldy. Qalǵandary boıynsha sotqa deıingi tergeý amaldary júrgizilýde, — delingen prokýratýra habarlamasynda.

Jalpy, jyl basynan beri prokýrorlar 30-dan astam balaǵa sot sheshimimen tıesili qarajattaryn alýǵa kómektesip, qadaǵalaý aktileri boıynsha olardyń paıdasyna 50 mıllıon teńgeden astam qaryzdy óndirip berdi.

Oblys prokýrory Madııar Basshybaev alımentter boıynsha sot aktileriniń oryndalýyn baqylaýdy kúsheıtý týraly eskertip, balalardyń quqyqtaryn qorǵaýdyń mańyzdylyǵyn erekshe atap ótti.

Eske salsaq, buǵan deıin Úkimet Memlekettik alıment qoryn qurý usynysyn qoldamaıtyny habarlandy.