Prokýratýra 5,8 mlrd teńgelik ınvestjobany zańsyz tekserýden arashalap qaldy
ASTANA. KAZINFORM — Aqmola oblysy Zerendi aýdanynyń prokýratýrasy Alekseev kaolın ken orny bazasynda taý-ken baıytý kombınatyn salý jobasyn júzege asyryp jatqan Qazaq Kaolin JShS ınvestorynyń quqyǵyn qorǵady.
Aqmola oblysy prokýratýrasynyń málimetinshe, ınvestıtsııalyq jobanyń jalpy quny — 5,8 mlrd teńge. Joba jumys oryndaryn ashýǵa jáne óńirdiń ónerkásiptik áleýetin damytýǵa múmkindik beredi.
Vedomstvonyń habarlaýynsha, júrgizilgen taldaý kezinde ýákiletti memlekettik organnyń ınvestorǵa qatysty kóshi-qon zańnamasynyń saqtalýy máselesi boıynsha prokýratýranyń mindetti kelisimin almaı jáne Quqyqtyq statıstıka jáne arnaıy esepke alý organdarynda tirkemeı tekserý júrgizgeni anyqtaldy.
— «Prokýrorlyq súzgi» tetigine sáıkes, ınvestorlarǵa qatysty tekserýler taǵaıyndaý, ákimshilik is júrgizýdi qozǵaý, ruqsat berý-shekteý sharalaryn qoldaný jáne sotqa talap qoıý týraly memlekettik organdardyń barlyq sheshimi prokýratýra organdarymen mindetti túrde kelisilýge tıis, — dep habarlady vedomstvo.
Prokýrorlyq qadaǵalaý aktisi boıynsha atalǵan tekserý zańsyz dep tanylyp, úsh ákimshilik is júrgizý toqtatyldy.
Qazirgi ýaqytta kináli laýazymdy tulǵalardy zańda belgilengen jaýapqa tartý máselesi qaralyp jatyr.
— Ákimshilik kedergilerge tap bolǵan nemese quqyǵy buzylǵan ınvestorlar 8 (705) 129-11-40 nómirine jáne 115 Call-ortalyǵy arqyly prokýratýra organdaryna habarlasa alady, — dep eskertti vedomstvo.
Eske salaıyq, buǵan deıin Almaty oblysynda ınvestorlardyń jumysyna kedergi keltirgen 18 sheneýnik jazalanǵanyn habarlaǵanbyz.
