Prokýror Q. Bıshimbaevtyń basty qateligin atady
ASTANA. KAZINFORM – Astanalyq sotta burynǵy Ulttyq ekonomıka mınıstri Qýandyq Bıshimbaev isi boıynsha taraptardyń jaryssózderi bastaldy. Eń aldymen prokýror Aıjan Aımaǵanova sóıledi.
«Biz tutas protsess boıy Bıshimbaevtyń ózine yńǵaısyz suraqtardy aınalyp ótip, ashyqtyǵyn kórsetip, qatelespeýge tyrysyp, sheber ótirik aıtqanyn baıqap otyrmyz. Biraq ol bir qatelik jiberdi», - dedi memlekettik aıyptaýshy.
Onyń aıtýynsha, Bıshimbaevtyń uıaly telefonynan Saltanatty azaptaǵan sátteri bar beınematerıal tabylǵanda kinásizdigi týraly barlyq nusqasy birden qırady.
«Ol uıaly telefonnyń qupııasózin bergende bul vıdeolardy túsirgenin, bári saqtalyp turǵanyn umytyp ketken. Nelikten? Óıtkeni ol muny únemi jasap kelgen, qyraǵylyǵy álsirep, esinen shyǵyp ketken. Bul vıdeolar tabylǵan sáttegi Bıshimbaevtyń reaktsııasyn barlyǵy baıqady. Ol abdyrap, basyn ustap, montaj ekenin aıta bastady. Biraq keıin 10 mınýttyq úzilisti paıdalanyp, vıdeony ózi túsirgenin moıyndady», - dedi A. Aımaǵanova.
Prokýror tańǵy 6:43-ten 8:24-ke deıingi aralyqta 20-dan astam vıdeoda eks-mınıstr Saltanatty uryp-soǵyp, azaptaǵanyn atap ótti.
«Bıshimbaev – shetelde oqyǵan, aýqatty otbasynda dúnıege kelgen joǵary bilimdi adam, burynǵy ekonomıka mınıstri, elimizdiń bet-beınesi. Ol jaı ǵana keshirim alýǵa laıyq emes, óz áreketi úshin eki ese jaýap berýi kerek», — dep tolyqtyrdy prokýror.
