Prokatqa shyǵatyn fılmderdi áýeli arnaıy komıssııa kórip, tekserýi múmkin
ASTANA. KAZINFORM – Mádenıet jáne aqparat mınıstrligi fılmge prokattaý kýáligin berýdiń tártibine ózgerister engizbekshi.
Bul ózgeris kınoteatrǵa shyǵatyn fılmderdiń mazmunyn rettep, tolyqqandy baqylaýdy engizý úshin, sondaı-aq prokattaý kýáligin berý jóninde alqaly sheshim qabyldaý úshin usynylyp otyrǵany aıtylǵan.
«Kınematografııa salasyndaǵy ýákiletti organnyń jazbasha suraý salýy boıynsha kórsetiletin qyzmetti alýshy fılmderdi prokattaý kýáligin alar aldynda olardyń qaraýyn uıymdastyrady. Kınoteatrǵa shyǵatyn fılmderdi kórý kınematografııa salasyndaǵy ýákiletti organnyń janynan qurylǵan, ýákiletti organnyń, QR Prezıdent Ákimshiliginiń ókilderinen turatyn komıssııamen júzege asyrylady», - dep jazylǵan 26 maýsymǵa deıin qoǵam talqylaýyna usynylyp otyrǵan qujat jobasynda.
