«Progrestiń» qulaýynan ýly jańbyr jaýýy múmkin
ASTANA. 25 tamyz. QazAqparat - Joǵalyp ketken «Progress M-12M» ǵarysh júk kemesiniń zymyrandyq otyny quramynda adam densaýlyǵyna qaýipti geptıl qospasy bolǵan. Odan ókpe qabynýy paıda bolady. Ǵalymdar keme áýede jarylǵanda ý atmosferaǵa aralasyp, jańbyrmen jaýýy múmkindigin joqqa shyǵarmaı otyr,
dep jazady Ytro.ru.
Keme bortynda barlyǵy 1,5 tonna toksındi otyn bolǵan. Onyń qansha mólsheri jarylys kezinde janyp, qanshasy aýa men topyraqqa túskeni ázirge belgisiz. Altaıdaǵy Choı aýdanynda keme qulaǵan jerde respýblıkalyq Gıgıena jáne epıdemıologııa ortalyǵynyń bir top mamandary jumys istep jatyr. Olar radıologııalyq zertteý júrgizip, topyraq quramyn tekseretin bolady.
«Geptıldiń totyǵýy kezinde túziletin zat gazdyń ózine qaraǵanda on ese qaýipti. Sebebi keme áýede jaryldy, otyn atmosferaǵa aralasyp, totyqqan zat jaýyn-shashynmen birge jerge túsýi múmkin. Biz topyraqtyń, shalshyq sýdyń úlgisin aldyq, sebebi búgin jańbyr jaýdy. Sonymen qatar oqıǵa ornynda gamma-sáýlelený deńgeıin ólshep jatyrmyz», - dedi Altaı Gıgıena jáne epıdemıologııa ortalyǵynyń radıolog-dárigeri Igor Obýhov Life News-ke bergen suhbatynda.
