«Progress MS-30» ǵarysh kemesi bar zymyran Baıqońyrdan sátti ushyryldy
ASTANA. KAZINFORM – Baıqońyr qystyń sońǵy kúnin ǵaryshqa sátti ushyrýmen qarsy aldy.
Astana ýaqytymen saǵat 2:24-te «Progress MS-30» ǵarysh júk kemesi «Baıqońyr» ǵarysh aılaǵyndaǵy 31-shi alańnan HǴS-qa attandy.
«Progress MS-30» kóliktik júk kemesi bar «Soıýz 2.1a» zymyran tasyǵyshyn ushyrý belgilengen ýaqytta ótti jáne josparlanǵandaı ótti. Baıqońyr ǵarysh aılaǵynan tikeleı efır ushyrylymǵa jarty saǵat qalǵanda bastaldy.
Zymyran tasyǵyshtyń búıirlik bólikterin bólý ushyrý tsıkliniń shemasyna sáıkes júrgizildi, júk kemesi orbıtaǵa toǵyzynshy mınýtta shyqty. Ǵaryshtyq júk kóliginiń ushýy eki kúndik qozǵalys kestesine sáıkes bolady, Halyqaralyq ǵarysh stantsııasymen túıisýi 2025 jyldyń 2 naýryzynda bolady. «Progress» stantsııaǵa 2,5 tonnadan astam júk jetkizedi.
Belgili bolǵandaı, ǵarysh aılaǵynda QR Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev pen Roskosmostyń jańa basshysy Dmıtrıı Bakanovtyń kezdesýi ótti.
Kezdesýdiń basty taqyryby – «Báıterek» birlesken jobasynyń barysy. Aǵymdaǵy máseleni talqylaý tek dóńgelek ústelde ǵana emes, tikeleı bolashaq starty orny – «Zenıt» zymyran tasyǵyshynyń tehnıkalyq kesheninde de ótti.
Taraptar mamandarynyń habarlaýynsha, qazirgi ýaqytta tehnologııalyq jabdyqtardy shyǵarý boıynsha jumystar jalǵasyp jatyr. Tehnıkalyq jáne starttyq keshender úshin úlgiler men buıymdardy zaýyttyq synaqtan ótkizý jumystary júrgizilý ústinde. «Soıýz-5» zymyran tasyǵyshynyń quramdas bólikterin synaý jumystary júrgizilip, jerústi ınfraqurylymdy jańǵyrtý boıynsha qurylys-montajdaý jumystary bastaldy.
Buǵan deıin habarlanǵandaı, «Báıterek» ǵarysh kesheninde ushyrý synaqtarynyń merzimi ózgerdi.
Sondaı-aq Qazaqstan men Reseı delegatsııalary Baıqońyrdyń aldaǵy mereıtoıyn talqylady. Buǵan deıin 70 jyl buryn Baıqońyrdyń ornynda ne bolǵanyn jazǵan edik.
Baıqońyrda týyp-ósken Dmıtrıı Bakanov úshin bul qyzmetke bir aı buryn taǵaıyndalǵan Roskosmostyń jańa basshysy retinde Baıqońyrǵa alǵashqy jumys sapary boldy
Ol óziniń suhbattarynyń birinde kosmonavtıkany damytýǵa atsalysý ol úshin úlken mártebe jáne jaýapkershilik ekenin atap ótti.
- Ǵarysh degen men úshin jaı sóz emes – bul meniń taǵdyrym. Úmitti aqtaý úshin bar kúshimdi salamyn, - dedi ol.