Profılaktıkalyq skrınıngter memleket kepildik bergen medıtsınalyq qyzmetter paketine engizildi

ASTANA. KAZINFORM – Prezıdenttiń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn jáne ózge de tapsyrmalaryn júzege asyrý sheńberinde Úkimet Densaýlyq saqtaý mınıstrligi tarapynan halyqqa medıtsınalyq qyzmetterdiń sapasy men qoljetimdiligin arttyrý boıynsha jumystar júrgizip jatyr.

MÁMS júıesi engizilgennen beri densaýlyq saqtaý salasyn qarjylandyrý kólemi úsh esege artty. Bul halyqtyń joǵary tehnologııalyq jáne qymbat qyzmetterge qoljetimdiligin keńeıtýge múmkindik berdi. Endi barlyq medıtsınalyq kómek naqty eki bólikke bólinedi: el turǵyndarynyń barlyǵyna memleket tolyq kepildik beretin bazalyq paket jáne saqtandyrylǵan azamattarǵa arnalǵan keńeıtilgen saqtandyrý paketi.

— Eń kóp taralǵan áleýmettik mańyzy bar aýrýlar boıynsha skrınıngter saqtandyrý mártebesine qaramastan barlyq azamattar úshin qoljetimdi. Bıyldan bastap 50 jastan asqan er adamdar úshin qaterli isikterdi, júrek-qan tamyrlary aýrýlaryn jáne mı qan aınalymynyń jiti buzylystaryn erte anyqtaý úshin skrınıngtiń jańa túrleri engiziledi. Áleýmettik mańyzy bar aýrýlarǵa shaldyqty degen kúdik týyndaǵan jaǵdaıda tekserýler osy zań aıasynda barlyǵyna da qoljetimdi bolady,— dep atap ótti Aqmaral Álnazarova. Osylaısha, reforma qyzmetterdegi túsinbeýshilikti joıyp qana qoımaı, búkil halyq úshin aýrýlardy erte anyqtaý men aldyn alýǵa basymdyq beriledi.

Al skrınıngten jyl saıyn ne úshin ótý kerek ekenin myna siltemeden oqyńyz.