Profı-rıngke alǵash shyqqan Abylaıhan Júsipov jeńiske jetti
SULEIMEN Promotions kompanııasy uıymdastyrǵan Atyraýdaǵy boks keshi aıasynda 2017 jylǵy Azııa vıtse-chempıony Tanzanııadan kelgen, 30-dan astam jekpe-jek ótkizgen tájirıbeli Meshak Mvankemvaǵa qarsy shyqty. Birinshi orta salmaqtaǵy jekpe-jek josparlanǵan barlyq alty raýnd boıy ótti. Qazaqstandyq bylǵary qolǵap sheberi sýdıalardyń sheshimi boıynsha jeńiske jetti.
Abylaıhan Júsipov – ulttyq qurama kóshbasshylarynyń biri. Ol 69 kelige deıingi salmaq dárejesinde Tokıoda ótetin 2020 jylǵy Olımpıadaǵa lıtsenzııa jeńip aldy.
Koronavırýs pandemııasyna baılanysty áýesqoı bokstaǵy jarystarda bos turyp qalýynyń saldarynan boksshy QR Ulttyq Olımpıada komıtetinen kásipqoı rıngte jekpe-jek ótkizýge ruqsat aldy.
Olympic.kz-ke bergen suhbatta Qazaqstan quramasynyń bas bapkeri Ǵalymbek Kenjebaev Abylaıhan Júsipovtiń ónerin joǵary baǵalady.
«Bizdiń boksshylarymyz epıdemııalyq jaǵdaıǵa baılanysty Iordanııada ótken Tokıo oıyndaryna azııalyq biliktilikten keıin eshqandaı jarystarǵa qatysqan joq. Biraq boksshylarǵa básekelestik tájirıbe qajet. Olımpıada oıyndaryna bir jyldan az ýaqyt qaldy. Biz áýesqoılardyń kásipqoı rıngte óner kórsetý múmkindiginen sheshim taptyq. Bekzat Nurdáýletov pen Abylaıhan Júsipov afrıkalyq boksshylarmen kezdesti. Olar fızıkalyq jaǵynan myqty. Sonymen qatar, olardyń esebinde kásibı rıngte óner kórsetý bar. Júsipov alty raýnd ótkizip, tehnıkalyq jáne taktıkalyq jaǵynan jeńiske jetti. Mundaı kezdesýler ol úshin óte mańyzdy. Ol alty raýndqa shydaıtynyn kórsetti», - dep atap ótti bas bapker.
Búgin, 4 qarasha kúni N.Ábdirov ayndaǵy sport saraıynda jýrnalıster úshin Abylaıhan Júsipovtiń ashyq jattyǵýy uıymdastyryldy.
«Men Qazaqstanda kásibı debıýt ótkizgenime qýanyshtymyn. Biz úshin bul jańa tájirıbe boldy, men jattyqtyrýshylardyń úmitin aqtap, olardyń maǵan bergen barlyq keńesterin oryndadym. Aldymen biz Qaraǵandyda daıyndaldyq, sodan keıin Almatyda oqý-jattyǵý jıyndaryn ótkizdik jáne sol jerden Atyraýǵa ushyp kettik. Qarsylasty zerttep, qarap, onyń tóbelesterin baqyladyq. Óte jaqsy boksshy, top-200 quramyna kiredi. Eger múmkindik bolsa, onda ári qaraı da kásipqoı rıngte óner kórsetetin bolamyz. Biraq qazir basty maqsat - Olımpıada oıyndary. Sondaı-aq, 22-29 qarasha aralyǵynda Shymkentte ótetin Qazaqstan chempıonatyna daıyndalyp jatyrmyz», - deıdi sportshy.
Abylaıhan Júsipovtiń jeke bapkeri Baýyrjan Amanbaev ony 8 jasynan bastap jattyqtyrady. Tálimger atap ótkendeı, boksshy erte jastan bastap alǵyr jáne tártipti boldy. Jattyqtyrýshysy jekpe-jekti teledıdardan kórgen.
«Áýesqoı boks úsh raýndqa, al kásibı alty raýndqa sozylady. Sondyqtan boksshyǵa asyqpaı, muqııat qarap, sodan keıin ǵana áreket etýge keńes berdim, - deıdi Baýyrjan Amanbaev. - Abylaıhan jaqsy óner kórsetti. Ol jarady! Erte jastan bastap óte alǵyr. Árqashan meniń aıtqan barlyq talapty oryndaıdy. Bári birden nátıje bermedi, biraq ol almaı eńbek etti. Kún saıyn biz 2-2,5 saǵattan eki ret aınalysamyz. Qazir biz Olımpıada oıyndary men Qazaqstan chempıonatyna daıyndalyp jatyrmyz. Qazaqstanda 69 kg salmaqta básekelestik óte joǵary, jáne árqashan solaı bolǵan, qarsylastar jetkilikti, sondyqtan tehnıkamen kóbirek jumys isteıtin bolamyz». - deıdi Baýyrjan Amanbaev.
Abylaıhan Júsipov 17 jasynan bokstan Qazaqstan ulttyq quramasyna kiredi. 19-da ol osy sport túrindegi eń jas olımpıadashy boldy. Qazir ol 23 jasta.
