Professor: Koronavırýstan emdelý úshin úreı men depressııaǵa berilmeý kerek
«2020 jyldyń qalaı ótip bara jatqanyn kórip otyrsyz. Qanshama adam vırýs juqtyryp, indetten qanshama adam kóz jumdy. Aýrýdyń azabynan áli birjolata qutylǵan joqpyz. Sol sebepti myna jaılarǵa áli de basa nazar aýdarý kerek. Eń aldymen, koronavırýsty aǵzaǵa engizip, ıaǵnı juqtyryp alýdan saqtanǵan jón. Al eger koronavırýs juqtyryp alsańyz, onyń aýyr áserin boldyrmaý kerek. Eń mańyzdysy osy. Aq halatty abzal jandar burynnan eskertip keledi: epıdemıologııalyq rejımdi qatań saqtaý kerek. Ekinshiden, koronavırýstyń adam aǵzasyna engennen keıin áser etý joldary bar. Kópshilik ony bile bermeıdi. Soǵan baılanysty eshqandaı asqyný bolmaý úshin aýrýdyń aldyn alý kerek. Úshinshiden, aýyrǵan adamdardy durystap saýyqtyrý kerek. Ol óte kúrdeli ári mazmundy jumys. Vırýsty eńserý úshin eń birinshiden adamnyń kóńil-kúıi kóterińki júrýi kerek, óıtkeni depressııa men úreı onsyz da aýyryp turǵan adamnyń eńsesin tipti túsirip, aǵzasyn álsiretip jiberedi», - deıdi Erbolat Dálenov QazAqparat tilshisine.
Professor elimizde koronavırýs juqtyrǵandardyń besten tórt bóligi aýrýdy jeńil kótergenin aıtady. Qalǵany orta jáne aýyr dárejede ótkerip jatyr.
«Koronavırýsty juqtyryp, aýyryp, emdelgender arqany keńge salmaýy kerek. «Immýnıtet paıda boldy, qoryqpaımyz» dep otyra bergen jón emes. Eń aldymen durys tamaqtaný kerek. Qazir koronavırýstyń eń bir áseri – adam aǵzasyna engen soń qyltamyrlardyń ishki qabatyna kirip, sol jerde qabyný protsesiniń órshýinde. Qyltamyrlardyń kóbi ókpede. Ókpe qabynsa koronavırýs ınfektsııasy sýrfaktant qatparyn qurtady. Ol maıly qatpar. Ókpege maı kerek. Erte kezde bizdiń halyq týberkýlez nemese tumaý kezinde qoıdyń quıryǵyn shyjǵyryp bergen, qymyz ishkizip, borsyqtyń maıyn ishkizgen. Ókpe – kóptegen garmonnyń deposy. Sondyqtan ókpe durys jumys isteýi úshin maı kerek», - deıdi Erbolat Dálenov.
