Professor Káken Qamzın alaıaqtardyń qurbany boldy — ІІM isti tergep jatyr

ASTANA. KAZINFORM — Tanymal jýrnalıst, fılologııa ǵylymdarynyń doktory, professor Káken Hamzın Almatyda alaıaqtardyń qurbany boldy. Qazir istiń mán-jaıyn quzyrly organdar tergep jatyr. 

Ortalyq kommýnıkatsııalar qyzmeti alańynda ótken baspasóz máslıhatynda BAQ ókili «Belgili jýrnalıst, professor Káken Hamzın alaıaqtarǵa aldanyp, jalǵyz páterin satyp, aqshasynan aıyrylypty osy oqıǵaǵa túsinik berińizshi» degen saýal qoıdy.

— Qylmys boıynsha tergeý amaldary júrip jatyr. Tergeý múddesine baılanysty, qazir istiń mán-jaıyn aıta almaımyn. Qylmystyq-protsestiń 201 babyna sáıkes is tergelip jatqan kezde, mán-jaıdy jarııalaýǵa bolmaıdy. Bul boıynsha jedel izdestirý amaldary júrip jatyr. Biz bundaı qylmystardyń qaıdan, qalaı jasalyp jatqanyn bilemiz. Qazir qylmyskerlerdiń aqshany qalaı alǵany, shetelge tranzaktsııamen jóneltilgenine qatysty tekserý júrip jatyr, — dep jaýap berdi Іshki ister mınıstrligi kıberqylmysqa qarsy is-qımyl departamentiniń bastyǵy Jandos Súıinbaı.

Aıta ketsek, buǵan deıin BAQ betterinde jáne áleýmettik jelide professor Káken Hamzın alaıaqtarǵa aldanyp, jalǵyz úıinen aıyrylǵaly jatyr degen taqyrypta birneshe jarııalanym shyqqan edi.

Eske salaıyq, quzyrly organdar sońǵy kezderi ınternet-alaıaqtyq túrlenip, jańa tsıfrlyq sheshimder qoldana bastaǵanyn eskertedi. 

Sondaı-aq taıaýda alty adamdy aldap, iri zalal keltirgen qazaqstandyq kúdikti Dýbaıda ustaldy.